काठमाडौं । छठ पर्वपछि खुलेको सेयर बजारमा दोहोरो अंकको गिरावट आएको छ । मंगलबार नेपाल स्टक एक्सचेञ्ज (नेप्से) परिसूचक १२.७९ अंकले घटेर २ हजार ६३६ अंकमा झरेको हो ।
आज कारोबारमा आएका कम्पनीमध्ये ८६ वटाको सेयर मूल्य बढेको छ भने १८५ वटाको घटेको छ । त्यस्तै, ९ कम्पनीको मूल्यमा कुनै परिवर्तन भएन ।
कारोबार अवधिभर अधिकांश समय बजारमा बिक्री चाप देखिँदा नेप्से परिसूचक रातो अंकमा रह्यो । यद्यपि, कारोबार रकम भने अघिल्लो दिनको तुलनामा वृद्धि भएको छ । अघिल्लो दिन ३ अर्ब ५ करोड रुपैयाँको कारोबार भएकोमा आज ४ अर्ब ७३ करोड रुपैयाँ बराबरको सेयर किनबेच भएको छ ।
आज अधिकांश समूहगत सूचक घटेका छन् । बैंकिङ समूह ०.४७, विकास बैंक ०.८४, फाइनान्स ०.५५, होटल तथा पर्यटन १.२१, जलविद्युत् ०.३१, लगानी ०.२७, जीवन बीमा ०.८४, उत्पादन तथा प्रशोधन ०.११, लघुवित्त ०.६०, निर्जीवन बीमा ०.६९, अन्य ०.५८ र व्यापार समूह ०.०२ प्रतिशतले घटेका हुन् ।
अपर लोहोरेखोला हाइड्रोपावरको मूल्य सर्वाधिक बढ्यो
आज अपर लोहोरेखोला हाइड्रोपावरको सेयर मूल्य सबैभन्दा धेरै ११.८४ प्रतिशतले बढेको छ । त्यस्तै, सेन्ट्रल फाइनान्सको ६ प्रतिशत, अपोलो हाइड्रोपावरको ५.६५ प्रतिशत, माउन्ट एभरेस्ट पावरको ५.५० प्रतिशत र सानीगढ हाइड्रोको ३.८० प्रतिशतले मूल्य वृद्धि भएको छ ।
यसैगरी, एभरेस्ट कलरको सेयर मूल्य ५.३६ प्रतिशतले घटेको छ । सीवाईसी लघुवित्तको ४.८६, विजय लघुवित्तको ४.४९, बेनी हाइड्रोपावरको ४.१२ र स्वस्तिक लघुवित्तको ३.६६ प्रतिशतले मूल्य घटेको छ ।