कीर्तिपुर। कामिल मिसराको कीर्तिमानी शतकप्रेरित चितवन राइनोजले नेपाल प्रिमियर लिग (एनपीएल) को तेस्रो संस्करणमा पहिलोपटक दोस्रो क्वालिफायरमा स्थान बनाएको छ । बुधबार त्रिवि क्रिकेट मैदानमा भएको इलिमिनेटरमा चितवनले काठमान्डु गोर्खाजलाई ६१ रनले पराजित गर्दै प्रतियोगितामा आफ्नो यात्रा अघि बढाएको हो ।
चितवनले दिएको २०५ रनको लक्ष्य पछ्याएको काठमान्डुले निर्धारित २० ओभरमा ९ विकेट गुमाएर १४३ रन मात्रै बनाउन सक्यो । चितवनको जितमा बलर रिजन ढकालले चार तथा उसमा मीरले तीन विकेट लिए । सलाहुद्दिन खान र कुशल मल्लले समान एक विकेट हात पारे ।
काठमान्डुका लागि विलियम बोसिस्टोले सर्वाधिक ३७ रन बनाए । उनले २८ बलमा तीन चौका र दुई छक्का प्रहार गरे । भीम सार्की ३० रनमा अविजित रहे भने साहान आराचिगेले २४ रन जोडे । उसका ओपनर साहिल पटेल र साम हेजलेट क्रमशः दुई र तीन रनमा आउट भएपछि टोली सुरुदेखि नै दबाबमा परेको थियो । रासिद खानले १२ रन बनाए पनि अन्य ब्याटरले उल्लेख्य योगदान दिन सकेनन् ।
त्यसअघि टस जितेर पहिले ब्याटिङ गरेको चितवनले निर्धारित २० ओभरमा तीन विकेट गुमाएर २०४ रन बनाएको थियो । उसका लागि कामिलले १२० रनको अविजित इनिङ खेले । उनले ५९ बलमा पाँच चौका र १० छक्का प्रहार गर्दै ५३ बलमै शतक पूरा गरे । योसँगै कामिल एनपीएल इतिहासमा सर्वाधिक व्यक्तिगत रन बनाउने खेलाडी बने । यसअघि कर्णाली याक्सका मार्क वाटले दोस्रो संस्करणमा लुम्बिनी लायन्सविरुद्ध बनाएको अविजित ११४ रन सर्वाधिक व्यक्तिगत स्कोर थियो ।
कामिलले कप्तान रवि बोपरासँग दोस्रो विकेटका लागि १५४ रनको साझेदारी गरे । यो साझेदारी एनपीएल इतिहासकै तेस्रो ठूलो साझेदारी हो । बोपराले ४२ बलमा तीन चौका र दुई छक्कासहित ५३ रन बनाए । १९औँ ओभरमा रासिद खानले उनलाई बोल्ड गर्दै साझेदारी तोडेका थिए ।
चितवनले चौथो ओभरमै ओपनर देव खनाल र डेविड मलानलाई गुमाएको थियो । देवले १७ रन बनाए भने मलान खाता नखोली आउट भए । दुवैलाई काठमान्डुका कप्तान करण केसीले पभेलियन फर्काएका थिए । तर कामिल र बोपराले सम्हालिएको ब्याटिङ गर्दै टोलीलाई ठूलो योगफलसम्म पुर्याए । अन्तिमतिर विवेक यादवले तीन बलमा दुई चौकासहित आठ रन जोडे ।
कामिल यस सिजनको दोस्रो तथा एनपीएल इतिहासको पाँचौँ शतकधारी बनेका छन् । यसअघि पहिलो संस्करणमा पोखरा एभेन्जर्सका आन्द्रे गौज तथा दोस्रो संस्करणमा कर्णालीका मार्क वाट र पोखराका एडम रोसिङ्टनले शतक बनाएका थिए । यसै सिजन पोखराका युवराज सामराले पनि शतक प्रहार गरेका थिए ।
लिग चरणमा चौथो भएको चितवनले पाँचौँ स्थानको काठमान्डुलाई हराउँदै दोस्रो क्वालिफायरमा स्थान बनाएको हो । पहिलो संस्करणमा इलिमिनेटरबाटै बाहिरिएको चितवन दोस्रो संस्करणमा सातौँ भएको थियो । उता काठमान्डु लगातार दोस्रोपटक इलिमिनेटरबाटै बाहिरिएको छ ।
चितवनले बिहीबार हुने दोस्रो क्वालिफायरमा सुदूरपश्चिम रोयल्ससँग प्रतिस्पर्धा गर्नेछ । पहिलो क्वालिफायरमा लुम्बिनी लायन्ससँग पराजित भएपछि सुदूरपश्चिमले दोस्रो क्वालिफायर खेल्न लागेको हो ।