कीर्तिपुर– नेपाल प्रिमियर लिग (एनपीएल) अन्तर्गत चितवन राइनोजले काठमाडौं गोर्खाजलाई २०५ रनको लक्ष्य दिएको छ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा मंगलबार टस जितेर पहिले ब्याटिङ गरेको चितवनले निर्धारित २० ओभरमा ४ विकेट गुमाउँदै २०४ रन बनाएको हो।
चितवनका कमल मल्लले ५९ बलमा १० छक्का र ५ चौकाको मद्दतमा अविजित १२० रन बनाए। त्यस्तै, रवि बोपाराले २ छक्का र ३ चौकासहित ५३ रनको योगदान दिए।
काठमाडौंका कप्तान करण केसी र राशिद खानले समान २–२ विकेट लिए।
आजको खेलको विजेता टोलीले बुधबार सुदूरपश्चिम रोयल्ससँग प्रतिस्पर्धा गर्नेछ। बुधबारको विजेता टोलीले शनिबार उपाधिका लागि लुम्बिनी लायन्ससँग भिड्नेछ।