काठमाडौं । मोटरसाइकलको पछाडि उभिएर भिडियो बनाएको दृश्य सामाजिक सञ्जालमा भाइरल भएपछि बाब्लु गुप्ताले आफ्नो गल्ती स्वीकार गर्दै सार्वजनिक रूपमा क्षमायाचना गरेका छन्।
सामाजिक सञ्जालमार्फत जारी गरेको सन्देशमा गुप्ताले बाल्यकालका खेल र पुराना सम्झनालाई समेटेर तयार गरिएको भिडियोको छायांकनका क्रममा मोटरसाइकल प्रयोग गरिएको बताएका छन्। उनले उक्त क्रममा आफूबाट ट्राफिक नियम उल्लङ्घन भएको स्वीकार गरेका छन्।
“मोटरसाइकलको पछाडि उभिएर भिडियो बनाउनु मेरो तर्फबाट भएको ट्राफिक नियम उल्लङ्घन हो भन्ने कुरा मैले महसुस गरेको छु,” उनले सन्देशमा उल्लेख गरेका छन्।
गुप्ताले आगामी दिनमा यस्ता गल्ती दोहोरिन नदिने प्रतिबद्धता जनाउँदै देश, समाज र जनताको हितलाई ध्यानमा राखी थप जिम्मेवार भएर अघि बढ्ने बताएका छन्। साथै, आफूबाट जानी वा नजानी भएको गल्तीप्रति सबैसँग क्षमायाचना पनि गरेका छन्।
