काठमाडौँ । नेपाली कांग्रेसले संस्थापक नेता बीपी कोइरालाको ४४औँ स्मृति दिवसको अवसरमा जलवायु परिवर्तनसम्बन्धी जनचेतना अभिवृद्धि गर्ने उद्देश्यले विभिन्न कार्यक्रम आयोजना गर्ने भएको छ।
कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानका अनुसार ६ साउनमा ५ किलोमिटर दौड प्रतियोगिता, ‘प्यानल डिस्कसन’ तथा ‘लाइभ पेन्टिङ’ कार्यक्रम सञ्चालन गरिनेछ।
‘जलवायु जनचेतना जगाऔँ’ भन्ने नारासहित आयोजना हुने दौड प्रतियोगिता बिहान ६ बजे ललितपुरस्थित यूएन पार्कबाट सुरु भई जावलाखेलसम्म हुनेछ। कार्यक्रममा प्रतिस्पर्धात्मक तथा सहभागितामूलक दुवै स्वरूपमा सहभागी हुन सकिने जनाइएको छ।
दौड सम्पन्न भएपछि बिहान ७ बजे जावलाखेल चोकमा ‘जलवायु परिवर्तनको चुनौती : समाधानका उपाय’ विषयमा प्यानल छलफल आयोजना गरिनेछ। सोही क्रममा चित्रकारहरूले जलवायु परिवर्तनका चुनौती र सम्भावनालाई चित्रमार्फत प्रस्तुत गर्दै ‘लाइभ पेन्टिङ’ प्रदर्शन पनि गर्नेछन्।
