काठमाडौँ । संस्कृति,पर्यटन तथा नागरिक उड्डयनमन्त्री खडकराज पौडेलले न्युनतम यात्रु संख्याको अभावले सबै विमानस्थलहरु नियमित रुपमा सञ्चालनमा ल्याउन नसकिएको स्पष्टिकरण दिएका छन् ।
बुधवार राष्ट्रिय सभा बैठकमा सांसदहरुले विभिन्न जिल्लाका विमानस्थलहरु सञ्चालनमा नभएको भन्दै मन्त्री पौडेलमाथि प्रश्न गरेका थिए । त्यसको जवाफ दिने क्रममा मन्त्री पौडेलले न्युनतम यात्रु संख्या नभएका जिल्लाहरुको विमानस्थल सञ्चालन गर्न नसकिएको स्पष्ट पारे । उनले विमानस्थल सञ्चालनका लागि सरकारसँग जनशक्ति र उपकरणको अभाव नभएको दाबी समेत गरे । मन्त्री पौडेलले सडकको सहज व्यवस्थाका कारण पनि हवाई यात्रुहरुको अभाव हुने अवस्था आएको पनि उल्लेख गरे ।
उनले भने,‘विमानस्थल संचालनको मुख्य समस्या भनेको यात्रुको अभाव रही आएको छ नेपालमा । करिव टोटलमा ५५ वटा विमानस्थहरु छन् । जसमा ३४ वटा विमानस्थलहरु संचालन योग्य छन् । २१ वटा सञ्चालन योग्य छैनन् । अधिकांश पहाडी क्षेत्रको विमानस्थलहरुबाट आउने रिपोर्टंहरु मध्ये पहिलो रिर्पोटमा नै यात्रु संख्यामा अभाव देखाउने गरिएको छ । त्यसको मुख्य कारणको रुपमा चाहीँ बसाईसराईं हुनु र गाउँगाउँमा बाटोको उपलब्धतामा पनि बढ्दै जानु र सडक सुृविधा हवाई भन्दा अलि सस्तो पनि रहनु हो । त्यो कारणले यात्रु संख्या कम भएको हामीलाई जानकारी आइरहेको छ । नेपाल नागरिक उडडयन प्राधिकरणबाट प्राप्त जवाफ अनुसार नै प्राविधिहरु चाहिएको खण्डमा त्यहाँ नियमित रुपमा उडान हुनेगरी न्युनतम यात्रु संख्याको उपलब्धता भएको खण्डमा हामीले प्राविधिक जनशक्ति उपकरणहरु अवश्य पठाउने छौ । त्यसमा हामीलाई कुनै पनि प्रकारको कमी नरहेको अवस्था हो ।’
मन्त्री पौडेलले विमानस्थलमा नियमित उडान भर्नका लागि जनशक्ति र उपकरण पठाउने कुरामा कुनै कमी नहुने प्रतिवद्धता पनि व्यक्त गरे ।
