काठमाडौं – फिफा विश्वकप फुटबल–२०२६ आज रातिबाट औपचारिक रूपमा सुरु हुँदैछ । फुटबल इतिहासमै पहिलोपटक तीन देश, अमेरिका, मेक्सिको र क्यानडाले संयुक्त रूपमा आयोजना गरेको यस विश्वकपको उद्घाटन नेपाली समयअनुसार राति १२ः४५ बजे हुने भएको छ ।
१९ जुलाईमा न्युयोर्कमा समापन हुने प्रतियोगिताको उद्घाटन तीन फरक देशमा विशेष समारोहसहित हुनेछ । पहिलो उद्घाटन कार्यक्रम मेक्सिको सिटी स्टेडियममा, दोस्रो क्यानडाको टोरन्टोमा र तेस्रो अमेरिकाको लस एन्जलसमा आयोजना गरिनेछ।
प्रतियोगिताको उद्घाटन खेल घरेलु टोली मेक्सिको र दक्षिण अफ्रिकाबीच हुनेछ। खेल नेपाली समयअनुसार राति पौने १ बजे सुरु हुनेछ।
यी दुई टोलीबीचको प्रतिस्पर्धालाई लिएर विशेष उत्सुकता देखिएको छ, किनभने उपलब्ध अन्तर्राष्ट्रिय फुटबल इतिहास अनुसार मेक्सिको र दक्षिण अफ्रिका विश्वकपको उद्घाटन चरणमा पहिलो पटक आमनेसामने हुन लागेका हुन् ।
दुवै टोलीले आफ्नो पहिलो खेलबाटै महत्वपूर्ण तीन अंक हासिल गर्ने लक्ष्यसहित मैदान उत्रिनेछन् । घरेलु समर्थकको बलियो साथ मेक्सिकोको पक्षमा रहने अनुमान गरिए पनि दक्षिण अफ्रिका पनि कडा प्रतिस्पर्धा गर्ने अपेक्षा गरिएको छ।
हेड–टु–हेड तथ्यांकमा मेक्सिको बलियो देखिएको छ। मेक्सिको र दक्षिण अफ्रिकाबीच अन्तर्राष्ट्रिय पुरुष फुटबलमा हालसम्म ४ पटक भेट भएको छ ।
यी भेटहरूमा मेक्सिकोले २ खेल जितेको छ भने दक्षिण अफ्रिकाले १ खेलमा जित हासिल गरेको छ। बाँकी १ खेल बराबरीमा टुंगिएको थियो।
