काठमाडौं। क्रिकेटको रोमाञ्च मैदानमा मात्र सीमित हुँदैन। हरेक चौका–छक्कामा गुञ्जिने हुटिङ, मनपर्ने टोलीको जितमा मनाइने खुसी र साथीभाइसँग बसेर खेल हेर्दाको उत्साह बेग्लै हुन्छ। नेपाल प्रिमियर लिग (एनपीएल) को तेस्रो संस्करणमा यही माहोल अब देशका विभिन्न सहरमा पनि देखिने भएको छ। एक्स्ट्रिम इनर्जी ड्रिंक्सले क्रिकेटप्रेमीलाई आफ्नै सहरमा एनपीएलको रोमाञ्च अनुभव गराउने उद्देश्यले देशभरका नौ सहरमा १० फ्यान जोन सञ्चालन गर्ने भएको छ।
कात्तिक ९ देखि मंसिर ५ गतेसम्म आयोजना हुने एनपीएलका खेल फ्यान जोनमा राखिएका ठूला एलईडी स्क्रिनमार्फत प्रत्यक्ष प्रसारण गरिनेछ। फ्यान जोनमा प्रवेश पूर्ण रूपमा निःशुल्क हुनेछ। यसले क्रिकेटप्रेमीलाई साथीभाइसँगै बसेर खेलको मजा लिन, मनपर्ने टोलीको समर्थनमा हुटिङ गर्न र प्रतियोगिताको उत्साह सामूहिक रूपमा साटासाट गर्ने अवसर दिनेछ।
एक्स्ट्रिमले काठमाडौंमा तीन स्थानमा फ्यान जोन सञ्चालन गर्नेछ। सिफल मैदान, कीर्तिपुरको माइक्रो पार्क र त्रिभुवन विश्वविद्यालय (त्रिवि) क्रिकेट मैदानको गेट नम्बर २ अगाडिको मैदानमा समर्थकले ठूलो स्क्रिनमा खेल हेर्न सक्नेछन्।
उपत्यकाबाहिर पनि एनपीएलको रौनक फैलाउने तयारी गरिएको छ। सुदूरपश्चिमको धनगढीस्थित कभर्ड हल क्षेत्रमा, कर्णालीको सुर्खेतस्थित घण्टाघर डबली, बुटवलको सिद्धेश्वरी ग्राउन्ड, पोखराको मालेपाटन चौर र चितवनको वीरेन्द्र बहुमुखी क्याम्पसको डिग्री कलेज परिसरमा फ्यान जोन सञ्चालन हुनेछन्। त्यस्तै, मधेस प्रदेशको जनकपुरस्थित १२ बिघा चौर र कोशी प्रदेशको विराटनगरस्थित पुरानो गुद्री मैदानमा पनि समर्थकले खेलको प्रत्यक्ष प्रसारण हेर्न पाउनेछन्।
फ्यान जोनलाई खेल हेर्ने स्थानमा मात्र सीमित नराखी मनोरञ्जन र सामूहिक उत्सवको केन्द्र बनाउने एक्स्ट्रिमको योजना छ। यहाँ खेलको प्रत्यक्ष प्रसारणसँगै सांगीतिक प्रस्तुति, मनोरञ्जनात्मक गतिविधि र विभिन्न उपहार कार्यक्रम आयोजना गरिनेछन्। समर्थकले मनपर्ने टोलीको जर्सी लगाएर साथीभाइसँग खेल हेर्नुका साथै विभिन्न गतिविधिमा सहभागी हुने अवसर पाउनेछन्।
एनपीएलप्रतिको बढ्दो उत्साहलाई क्रिकेट मैदानको सीमाभन्दा बाहिर पुर्याउँदै देशका विभिन्न सहरका समर्थकलाई एउटै माहोलमा जोड्ने उद्देश्यले फ्यान जोन सञ्चालन गर्न लागिएको कम्पनीले जनाएको छ। यस पहलले रंगशालामै पुगेर खेल हेर्न नसक्ने क्रिकेटप्रेमीलाई पनि आफ्नै सहरमा ठूलो स्क्रिनमा खेल हेर्दै प्रतियोगिताको रोमाञ्च अनुभव गर्ने अवसर दिने अपेक्षा गरिएको छ।
खेल, संगीत र मनोरञ्जनलाई एकै ठाउँमा जोड्ने फ्यान जोन एनपीएल अवधिभर क्रिकेटप्रेमीका लागि आकर्षणको केन्द्र बन्ने अपेक्षा गरिएको छ।
