काठमाडौं । बंगालको खाडीमा विकसित हुँदै गरेको चक्रवाती आँधीको प्रभावले आगामी साता नेपालका विभिन्न स्थानमा भारी वर्षा हुन सक्ने मौसमविद्हरूले चेतावनी दिएका छन् । आगामी बुधबारदेखि आइतबारसम्मको अवधिमा केही स्थानमा कुल वर्षा २०० मिलिमिटरभन्दा बढी हुन सक्ने अनुमान गरिएको छ ।
मौसमविद् विनोद पोखरेलले सामाजिक सञ्जालमार्फत आगामी दिनमा भारी वर्षाको सम्भावना रहेको उल्लेख गर्दै सतर्कता अपनाउन आग्रह गरेका छन् । उनका अनुसार पूर्वानुमानले केही स्थानमा उक्त अवधिभरको कुल वर्षा २०० मिलिमिटरभन्दा बढी हुन सक्ने देखाए पनि एकै दिनमा त्यति पानी पर्ने भन्ने अर्थ लाग्दैन । वर्षाको वास्तविक मात्रा, समय र प्रभावित क्षेत्र भने परिवर्तन हुन सक्ने उनले स्पष्ट पारेका छन् ।
पोखरेलका अनुसार वर्षाको प्रभाव त्यसको अवधि, स्थान र स्थानीय मौसमी अवस्थामाथि निर्भर रहनेछ । अहिले धान काट्ने समय र हिमाली क्षेत्रमा पर्यटक तथा अन्य यात्रुको आवागमन बढ्ने अवधि भएकाले सम्भावित वर्षाले कृषि तथा पर्यटन क्षेत्रमा असर पार्न सक्ने जोखिम छ ।
उनले उच्च हिमाली क्षेत्रमा भारी हिमपात, अत्यधिक चिसो र हिमपहिरोको जोखिमसमेत बढ्न सक्ने बताएका छन् । त्यसैले मौसमसम्बन्धी पछिल्ला जानकारी र आधिकारिक सूचनाहरू हेरेर मात्रै यात्राको योजना बनाउन उनले आग्रह गरेका छन् ।
पोखरेलले अहिले विकसित भइरहेको मौसमी प्रणालीले सन् २०१४ अक्टोबर १४ मा आएको हिमआँधीको घटनालाई सम्झाएको पनि उल्लेख गरेका छन् । उक्त घटनामा अन्नपूर्ण क्षेत्र आसपासका पदयात्रा मार्गमा ४३ जनाले ज्यान गुमाएका थिए । अहिलेको पूर्वानुमानमा त्यतिबेलाका केही मौसमी सूचकसँग मिल्दोजुल्दो अवस्था देखिए पनि यसपटक पनि त्यस्तै परिणाम दोहोरिन्छ भन्ने निश्चित नभएको उनले बताएका छन् । समयमै सतर्कता अपनाएर सम्भावित जोखिम न्यूनीकरण गर्न सकिने उनको भनाइ छ ।
बंगालको खाडीबाट विकसित हुने न्यून चापीय प्रणाली नेपालतर्फ नजिकिँदै माथिल्लो वायुमण्डलमा रहेको न्यून चापीय प्रणालीसँग अन्तरक्रिया गरेमा भारी वर्षाको सम्भावना बढ्न सक्ने पोखरेलले उल्लेख गरेका छन् ।
जल तथा मौसम विज्ञान विभागका अनुसार शुक्रबार बिहान ५ः४५ बजे बंगालको खाडीको पूर्वमध्य भाग तथा आसपासको दक्षिणपूर्वी क्षेत्रमा न्यून चापीय क्षेत्र बनेको थियो । उक्त प्रणाली क्रमशः शक्तिशाली हुँदै सोमबारसम्म चक्रवाती आँधीमा विकसित हुन सक्ने विभागको अनुमान छ ।
चक्रवाती आँधीमा विकसित भएपछि प्रणाली पश्चिम–उत्तरपश्चिम दिशातर्फ अघि बढ्दै भारतको उत्तरी आन्ध्र प्रदेश र दक्षिणी ओडिशाको तटीय क्षेत्र आसपास प्रवेश गर्ने सम्भावना रहेको विभागले जनाएको छ ।
यस प्रणालीले आगामी बुधबार (अक्टोबर २८) देखि आइतबार (नोभेम्बर १) सम्म नेपालमा प्रभाव पार्न सक्ने अनुमान गरिएको छ । यद्यपि, यसबाट नेपालमा कति वर्षा हुन्छ, जोखिमको स्तर कस्तो रहन्छ र कुन क्षेत्रमा बढी असर पर्छ भन्ने विषयमा अहिले नै यकिन गर्न नसकिने विभागले स्पष्ट पारेको छ ।
सम्भावित प्रतिकूल मौसमले कृषि तथा पर्यटन क्षेत्रमा असर पार्न सक्ने भएकाले सम्बन्धित सबै पक्षलाई सतर्क रहन विभागले आग्रह गरेको छ । साथै, आगामी एक सातामा देशका विभिन्न भागमा अधिकतम तथा न्यूनतम तापक्रममा समेत सामान्य गिरावट आउन सक्ने अनुमान गरिएको एएनआईले जनाएको छ ।
