काठमाडौँ – एसियाली गेम्स छनोट अन्तर्गत आइतबार नेपाली पुरुष र महिला क्रिकेट टिमले एउटै समयमा चीनसँग प्रतिस्पर्धा गर्दैछन् ।
पुरुष टिमको पहिलो खेल सिंगापुरमा हुँदैछ भने महिला छनोटको अन्तिम अर्थात् तेस्रो स्थानका लागि हुन लागेको खेल मलेसियामा हुँदैछ ।
एसियन गेम्सको छनोट चरण पार गर्न नेपाली महिला टिमले आजको खेल जित्नैपर्ने दबाब छ । सेमिफाइनलमा मलेसियासँग पराजित भएर एक खेल अगाडि गेम्समा छनोट हुने अवसर गुमाएको नेपाली महिला टिम तेस्रो स्थानका लागि चीनसँग प्रतिस्पर्धा गर्नु परेको हो ।
टस जितेर चिनियाँ महिला र पुरुष दुवै टिमले फिल्ड रोजेपछि नेपाली दुवै टिमले सुरुमा ब्याटिङ गर्दैछन् ।
पुरुष टिमले भने पहिलो खेल खेल्न लागेको हो । दुई समूह रहेको प्रतियोगिताबाट शीर्ष २–२ टोली एसियाली खेलकुदका लागि छनोट हुनेछन् । नेपालको समूहमा चीन र मलेसिया छन् ।
