काठमाडौँ – इन्डियन प्रिमियर लिग (आईपीएल)मा देखिएको १५ वर्षीय किशोरको ब्याटिङ क्षमताको विश्वका क्रिकेट समर्थकले प्रशंसा गरिराखेका छन् । केवल १५ वर्षको उमेरमा उनले आईपीएलको इतिहासमै सायद अहिलेसम्मकै सबैभन्दा उत्कृष्ट सिजन बिताएका छन् । ६८० रन (सबैभन्दा बढी रन), २४२.८५ उच्चतम स्ट्राइक रेट र ६५ छक्का उनका महत्त्वपूर्ण उपलब्धि हुन् ।
उनी मात्र १५ वर्षका हुन् तर उनी त्योभन्दा धेरै माथि छन् । यति तीव्र गतिको बलिङ विरुद्ध यति धेरै सङ्ख्यामा र यति सहजै छक्का प्रहार गर्ने कला यसअघि कहिल्यै देखिएको थिएन । सूर्यवंशीले अहिले जे गरिरहेका छन्, त्यो हामीले उनको उमेरमा देख्ने काल्पनिक सपनाभन्दा टाढाको कुरा हो ।
ब्याटलाई माथि उठाउने उनको कला फरक छ । तिखो नजर, बलियो प्रहार गर्दा पनि देखिने अद्भुत शारीरिक सन्तुलन, अफ-साइडतर्फ ढल्कने शैली, शरीरको माथिल्लो भागको घुमाइ र मिलिसेकेन्डमै निर्णय लिने क्षमता उनको अद्भूत छ । यसअघि यू–१९ विश्वकप र अघिल्लो आईपीएलमा पनि यो लय देखिएको थियो । उनीसँग जन्मजात क्षमता छ । उनी हरेक समय कडा मिहिनेत खर्चिसकेका छन् ।
जब-जब सूर्यवंशी क्रिजमा उत्रिन्छन्, तब-तब यस खेलमा मानवीय रूपमा के सम्भव छ भनेर हेर्ने अवसर मिल्छ । उनले केभिन पिटरसनसँगको अन्तर्वार्तामा भनिसकेका छन् कि उनी टी-२० इनिङ्समा दोहोरो शतक बनाउन सक्ने क्षमता राख्छन् । हैदराबाद विरुद्धको खेलमा त त्यो अन्तर्वार्ता प्रसारण हुनुअघि नै उनले यो कोसेढुङ्गा पार गर्ने जस्तो छाँट देखाएका थिए । त्यो क्षण शुक्रबार गुजरात टाइटन्स विरुद्धको क्वालिफायर २ मा आउन सक्छ ।
आईपीएल २०२६ मा १५ खेल खेल्दा उनी ६८० रन बनाउँदै सर्वाधिक रनकर्ताको सूचीको पहिलो नम्बरमा छन् । उनले विश्व क्रिकेटका नामुद खेलाडीलाई पछाडि पार्दै यो रेकर्ड बनाएका हुन् । उनले एउटा शतक बनाउँदा चार वटा अर्धशतक बनाउँदा ६५ वटा छक्का र ५५ वटा चौका हिर्काएका छन् ।
सर्वाधिक रनकर्ताको सूचीको दोस्रो नम्बरमा साई सुदर्शन छन् भने तेस्रो नम्बरमा हेनरिक काल्सन छन् । उनीहरुले क्रमश ६५२ र ६२४ रन बनाएका छन् । शुभमन गिलले ६१८, इशन किसानले ६०२ रन बनाउँदा विराट कोहलीले ६०० रन बनाएका छन् ।
राजस्थान रोयल्सका ओपनर वैभव सूर्यवंशीले विश्वकै नामुद ब्याट्सम्यानको रेकर्ड १५ वर्षकै उमेरमा तोडेपछि उनको व्यापक चर्चा छ । आईपीएल २०२६ को इलिमिनेटर खेलमा सनराइजर्स हैदरावादविरुद्धको खेलमा २९ बलमा ९७ रन बनाउँदा उनले ब्याटिङका राजा मानिएका क्रिस गेलको सर्वाधिक छक्का प्रहारको रेकर्ड तोडेका छन् । गेलले आईपीएलको एउटा सिजनमा ५९ छक्का प्रहार गर्दै बनाएको रेकर्डलाई उनले ६५ छक्का प्रहार गरेर तोडेका हुन् ।
छिटो अर्धशतकको सूचीमा वैभव
छिटो शतक बनाउन तीन रनले चुकेका वैभव छिटो अर्धशतक बनाउने खेलाडीको सूचीमा बराबरी गर्न सफल भएका छन् । सन् २०१४ मा सुरेश रैनाले १६ बलमा बनाएको आईपीएलको छिटो अर्धशतकको रेकर्ड उनले बराबरी गरेका हुन् । उनले बुधबारको खेलमा १६ बलमा अर्धशतक बनाउँदै १२ वर्षपछि रैनाको रेकर्डमा बराबरी गरेका हुन् ।
१५ खेल खेल्दा विभिन्न रेकर्ड बनाएका वैभवको खेल दोस्रो क्वालिफायरमा हेर्न सकिने छ । शुक्रबार दोस्रो क्वालिफायरमा वैभवको प्रदर्शन कस्तो होला ? त्यो धेरैको प्रतिक्षाको विषय बनेको छ । दोस्रो क्वालिफायरमा पनि राजस्थान विजयी भए फाइनलमा आरसिबीसँग प्रतिस्पर्धा गर्न पुग्नेछ ।
यो सिजन राजस्थान फाइनल पुगेमा वैभवका नाममा दर्जनौ रेकर्ड बन्नेछन् । आईपीएल यो सिजनको फाइनल आइतबार हुँदैछ ।
