बिहीबार आयोजित पत्रकार सम्मेलनमार्फत प्रतिष्ठानले प्रतियोगितामा साविक विजेता नेपाल पुलिस क्लब, सशस्त्र प्रहरी बलको एपीएफ क्लब, न्यु डायमन्ड युथ स्पोर्ट्स क्लब, त्रिभुवन आर्मी क्लब र एभरेष्ट भलिबल क्लब गरी पाँच टोलीको सहभागिता रहने जानकारी दिएको छ।
नेपाल भलिबल संघको प्राविधिक सहयोगमा सञ्चालन हुने प्रतियोगिताका सहभागी टोलीलाई दुई समूहमा विभाजन गरी लिग–कम–नकआउट आधारमा खेल सञ्चालन गरिनेछ। प्रतियोगिता त्रिपुरेश्वरस्थित राष्ट्रिय खेलकुद परिषद्को कभर्डहलमा हुनेछ।
आयोजकका अनुसार प्रतियोगिताका विजेता टोलीले नगद पाँच लाख रुपैयाँ प्राप्त गर्नेछ भने उपविजेताले दुई लाख ५० हजार र तेस्रो हुने टोलीले एक लाख २५ हजार रुपैयाँ नगद पुरस्कार पाउनेछन्। यस्तै प्रतियोगिताको सर्वोत्कृष्ट खेलाडीलाई नगद ५० हजार रुपैयाँसहित अन्य आकर्षक पुरस्कार प्रदान गरिनेछ।
विधागततर्फ उत्कृष्ट खेलाडीलाई जनही २५ हजार रुपैयाँ नगद पुरस्कार प्रदान गरिनेछ भने प्रत्येक खेलको ‘प्लेयर अफ द म्याच’ लाई १५ हजार रुपैयाँ नगद पुरस्कार दिइने आयोजकले जनाएको छ।
पुरस्कार राशी मात्रै १३ लाख रुपैयाँ रहेको प्रतियोगिताको अनुमानित बजेट करिब ४० लाख रुपैयाँ रहेको छ। साथै नवौं संस्करणको उद्घाटन समारोहका अवसरमा एक जना राष्ट्रिय खेलाडीलाई नगद ५० हजार रुपैयाँसहित शेरबहादुर खड्का स्पेसल अवार्डबाट सम्मान गरिनेछ।
