बुटवल, २८ कार्तिक — अपाङ्गता भएका व्यक्तिहरूको लागि नेपाल बोसिया संघ (NBAD), काठमाडौंको आयोजनामा तथा रोटरी क्लब अफ बुटवल तिनाउ र सुस्तमनस्थिति बाल विद्या मन्दिर, बुटवलको सहकार्यमा सेरेब्रल पल्सी तथा गम्भीर अपाङ्गता भएका बालबालिकाहरूलाई खेलकुदको माध्यमबाट समावेशी वातावरण प्रदान गर्ने उद्देश्यले बोसिया खेलको प्रदर्शनी तथा प्रतियोगिता सफलतापूर्वक सम्पन्न गरिएको छ।

कार्यक्रमको उद्घाटन कार्यक्रम तथा समग्र संयोजन बोसिया संघका महासचिव श्री महेश्वर घिमिरेले गरेका थिए।
एबिलिस फाउन्डेशनको सहयोगमा सम्पन्न प्रतियोगितामा, विशेषगरी सेरेब्रल पाल्सी तथा गम्भीर अपाङ्गता भएका बालबालिकाहरूको उत्साहजनक सहभागिता रहेको थियो।

कार्यक्रमले बोसिया खेलले बालबालिकाको आत्मविश्वास, ध्यान केन्द्रित गर्ने क्षमता तथा शारीरिक विकासमा महत्वपूर्ण योगदान पुर्‍याउने संदेश दिएको छ।कार्यक्रमका संयोजक तथा NBAD की संस्थापक अध्यक्ष गोमा पौडेलले प्रदर्शन सत्रको सहजीकरण गर्दै बोसिया जस्ता समावेशी खेलहरूले बालबालिकाहरूको भित्री क्षमता, सामाजिक, भावनात्मक तथा बौद्धिक विकासमा प्रभावकारी भूमिका खेल्ने बताइन्।

उद्घाटन कार्यक्रम NBAD की अध्यक्ष गोमा देवी पौडेलको अध्यक्षतामा सम्पन्न भयो। कार्यक्रममा बुटवल उपमहानगरपालिका–७ का वडा अध्यक्ष पदम राज गाह प्रमुख अतिथि रहनुभएको थियो। आफ्ना भनाइमा उनले बौद्धिक वा अन्य गम्भीर अपाङ्गता भएका बालबालिकाहरूको क्षमता विकासका लागि यस्ता कार्यक्रमहरू अत्यन्त महत्वपूर्ण भएको उल्लेख गर्दै आगामी दिनमा निरन्तरता दिन सबै सरोकारवालाको ध्यानाकर्षण गराउनु भएको थियो।

कार्यक्रममा उल्लिखित अतिथिहरूको उपस्थिति रहेको थियो:-
लोक राज भुषाल, अध्यक्ष, सुस्तमनस्थति बाल विद्या मन्दिर
यादवचन्द्र बिष्ट, शिक्षा अधिकृत, शिक्षा तथा खेलकुद शाखा, बुटवल उप महानगरपालिकासावित्रा घिमिरे, संघीय सदस्य, राष्ट्रिय अपाङ्ग महासंघ नेपाल (NFDN) तथा अपाङ्गता समन्वय समिति सदस्ययम लाल मरासिनी, संघीय सदस्य, बौद्धिक अपाङ्गता अभिभावक महासंघ (PFPID)देवी वाग्ले, संस्थापक अध्यक्ष, रोटरी क्लब अफ बुटवलउमा आचार्य, अध्यक्ष, रोटरी क्लब अफ बुटवल तिनाउकल्पना ढकाल, अध्यक्ष, अपाङ्गता महिला संघ रुपन्देही।

प्रमुख अतिथिले आगामी दिनमा यस खेलका लागि आवश्यक सामग्री तथा अन्य सहयाेग गर्ने बाचा समेत गर्नु भएको थियो।
अतिथिहरूले यस्ता कार्यक्रमहरूले अपाङ्गता भएका बालबालिकालाई सशक्तिकरण र हौसला प्रदान गर्ने हुँदा निरन्तरता दिनुपर्ने धारणा राख्नु भयो।

कार्यक्रमको सुरुवात बाल विद्या मन्दिरकी प्रधानाध्यापक मुना भुषाल पाठकको स्वागत भाषणबाट भएको थियो। साथै रोटरी क्लब अफ बुटवल तिनाउले सहभागी बालबालिकालाई खेलकुद पोशाक प्रदान गरिएको थियो।

नेपाल बोसिया एशोसिएशनले आगामी दिनमा विभिन्न प्रदेशहरूमा यस्तै प्रदर्शनी तथा प्रतियोगिता सञ्चालन गर्दै प्रतिभा पहिचान तथा अपाङ्गता भएका बालबालिकाका लागि खेलकुदका अवसरहरू थप विस्तार गरिने प्रतिबद्धता व्यक्त गरिएको छ।