भुरीगाउँ (बर्दिया) । कर्णाली प्रदेशमा आयोजना हुन लागेको दशौँ राष्ट्रिय खेलकुद प्रतियोगिताका चार खेल लुम्बिनी प्रदेशमा सञ्चालन हुने भएपछि खेलस्थलको पूर्वाधार व्यवस्थापन तथा तयारीलाई तीव्र पारिएको छ ।
प्रतियोगिताअन्तर्गत बाँकेको नेपालगन्जमा पौडी र सुटिङ तथा बर्दियामा खोखो र टेनिस खेल सञ्चालन हुनेछन् । खेल सञ्चालनका लागि आवश्यक पूर्वाधार मर्मत, सुधार तथा व्यवस्थापनको काम भइरहेको साविक मध्यपश्चिम क्षेत्रीय खेलकुद विकास समितिका प्रमुख महेश चन्दले जानकारी दिए ।
नेपालगन्ज रङ्गशालास्थित पौडी पोखरीमा रङरोगन, टायल परिवर्तन तथा मर्मतसम्भारको काम भइरहेको छ । पोखरीको अवस्था सामान्यतः राम्रो रहे पनि बाहिरी भागका टायल उप्किएको र रङरोगन आवश्यक भएकाले सुधारको काम अन्तिम चरणमा पुगेको चन्दले बताए ।
त्यसैगरी बर्दियाको ठाकुरबाबा नगरपालिका–१ भुरीगाउँस्थित खोखो कभर्ड हललाई प्रतियोगिताका लागि तयार पारिएको छ । बर्दियामा खोखोसँगै टेनिस प्रतियोगिता पनि सञ्चालन हुनेछ । टेनिस खेल गुलरियास्थित कभर्ड हलमा आयोजना गरिनेछ । दुवै खेलस्थलमा आवश्यक मर्मत तथा पूर्वाधार व्यवस्थापनको काम अघि बढाइएको छ ।
दशौँ राष्ट्रिय खेलकुद प्रतियोगिताअन्तर्गत मङ्सिर ८ गतेदेखि विभिन्न खेलका प्रतिस्पर्धा सुरु हुनेछन् । प्रतियोगिताको औपचारिक उद्घाटन भने मङ्सिर १६ गते सुर्खेतको वीरेन्द्रनगरस्थित कर्णाली प्रदेश रङ्गशालामा हुनेछ ।
प्रतियोगितामा ३२ खेलका ३८४ इभेन्ट समावेश गरिएका छन् । सात प्रदेश, नेपाली सेना, नेपाल प्रहरी, सशस्त्र प्रहरी बल र गैरआवासीय नेपाली सङ्घ (एनआरएनए) गरी ११ टोलीका खेलाडीले प्रतिस्पर्धा गर्नेछन् ।
प्रतियोगितामा ३८४ स्वर्ण, ३८४ रजत र ५६९ कास्य गरी कुल एक हजार ३३७ पदकका लागि प्रतिस्पर्धा हुनेछ ।
प्रतियोगिताका खेल कर्णाली प्रदेशका पाँच र लुम्बिनी प्रदेशका दुई जिल्लामा सञ्चालन हुनेछन् । सुर्खेतमा २३ खेल आयोजना हुनेछन् भने नेपालगन्ज, बर्दिया र सल्यानमा समान दुई–दुई खेल सञ्चालन हुनेछन् । त्यसैगरी दैलेख, कालीकोट र पश्चिम रुकुममा एक–एक खेल आयोजना गरिनेछ ।
भुरीगाउँमा खोखोको तयारी पूरा
बर्दियाको भुरीगाउँमा मङ्सिर १९ देखि २३ गतेसम्म खोखो प्रतियोगिता सञ्चालन हुनेछ । प्रतियोगितामा सात प्रदेश र तीन विभागीय टोली सहभागी हुनेछन् । यसका लागि प्रदेश तथा विभागीय टोलीले खेलाडी छनोट गरिसकेका छन् ।
लुम्बिनी प्रदेश खोखो सङ्घका महासचिव तथा प्रशिक्षक खगेन्द्र शाहीले लुम्बिनी प्रदेशको टोली छनोट भइसकेको जानकारी दिए । अन्य प्रदेश र विभागीय टोलीसमेत प्रतियोगिताका लागि तयारी अवस्थामा रहेको उनले बताए ।
भुरीगाउँस्थित कभर्ड हल खोखो खेलका लागि निर्माण गरिएको नेपालकै सुविधासम्पन्न हलमध्ये एक हो । म्याटसहितको सुविधा रहेको उक्त हलमा रङरोगन तथा आवश्यक मर्मतसम्भारको काम सम्पन्न भइसकेको छ ।
ठाकुरबाबा नगर खेलकुद विकास समितिका अध्यक्ष तीर्थबहादुर खड्काका अनुसार कभर्ड हलमा बत्ती जडान तथा अन्य आवश्यक व्यवस्थापनका काम पनि पूरा भएका छन् ।
यद्यपि, आठौँ राष्ट्रिय खेलकुद प्रतियोगिताका क्रममा प्रयोग गरिएको म्याट भने पुरानो र जीर्ण अवस्थामा छ । करिब एक दशक पुरानो म्याट प्रतिस्थापन गर्नुपर्ने आवश्यकता रहेको खड्काले बताए ।
प्रतियोगिताको तयारीका क्रममा राष्ट्रिय खेलकुद परिषद् तथा प्रदेशस्तरीय प्राविधिक टोलीले बर्दियाका खेलस्थलको पटक–पटक अनुगमन गरिसकेका छन् ।
बर्दिया खेलकुद विकास समितिका पूर्वअध्यक्ष खगेन्द्र खनालले प्रतियोगिता भव्य र व्यवस्थित रूपमा सम्पन्न गर्न स्थानीय सरकार, खेलकुद विकास समिति तथा अन्य सरोकारवाला निकाय आ–आफ्नो क्षेत्रबाट जुटिरहेको बताए ।
नेपालगन्जमा पौडी र सुटिङ
बाँकेको नेपालगन्जस्थित रङ्गशालामा पौडी र सुटिङ प्रतियोगिता सञ्चालन हुनेछन् । निर्धारित तालिकाअनुसार पौडी मङ्सिर ८ गते र सुटिङ मङ्सिर १६ गतेदेखि सुरु हुनेछ ।
पौडी पोखरीको अवस्था निरीक्षण गर्न प्राविधिक टोली शनिबार नेपालगन्ज आउने तयारीमा रहेको प्रमुख चन्दले जानकारी दिए ।
उनका अनुसार सुटिङ रेन्जका बिग्रिएका १० वटा उपकरण मर्मत गर्न आवश्यक पाटपुर्जा विदेशबाट मगाइएको छ । ती सामग्री आइपुगेपछि जडान गरी सुटिङ रेन्जलाई प्रतियोगिताका लागि पूर्ण रूपमा तयार पारिनेछ ।
दशौँ राष्ट्रिय खेलकुदमा व्यक्तिगत स्पर्धातर्फ स्वर्ण पदक विजेताले २० हजार, रजत विजेताले १५ हजार र कास्य विजेताले आठ हजार रुपैयाँ पुरस्कार पाउनेछन् । टोलीगत स्पर्धामा स्वर्ण जित्नेले १५ हजार, रजतले १० हजार र कास्य पदक विजेताले आठ हजार रुपैयाँ प्राप्त गर्नेछन् ।
कर्णाली प्रदेशलाई मुख्य आयोजनास्थल बनाएर सञ्चालन हुन लागेको राष्ट्रिय खेलकुदका केही प्रतिस्पर्धा लुम्बिनी प्रदेशमा समेत आयोजना हुनुले यस क्षेत्रका खेल पूर्वाधारको उपयोग र खेल गतिविधि विस्तारमा सहयोग पुग्ने अपेक्षा गरिएको छ । राष्ट्रियस्तरको प्रतियोगिता आफ्नै क्षेत्रमा आयोजना हुँदा स्थानीय खेलाडीले घरेलु मैदानमै आफ्नो प्रतिभा प्रदर्शन गर्ने अवसरसमेत पाउनेछन् ।