काठमाडौँ । निर्वाचन आयोगले आगामी स्थानीय तहको निर्वाचनको तयारी अघि बढाएको छ । निर्वाचनको तयारीस्वरूप आयोगले राष्ट्रिय मान्यता प्राप्त राजनीतिक दलहरूसँग छलफल तथा परामर्श प्रक्रिया सुरु गर्न लागेको हो ।
आयोगले आज बिहान ११ः३० बजेका लागि विभिन्न राष्ट्रिय राजनीतिक दलका प्रतिनिधिलाई छलफलमा आमन्त्रण गरेको छ । आयोगका प्रवक्ता नारायणप्रसाद भट्टराईले स्थानीय तहको निर्वाचनका विषयमा परामर्श गर्न दलहरूलाई बोलाइएको जानकारी दिए ।
उनका अनुसार छलफलमा स्थानीय तह तथा प्रदेश निर्वाचनको तयारी, निर्वाचनको मिति निर्धारण, व्यवस्थापन र आवश्यक पूर्वतयारीका विषयमा दलहरूसँग सुझाव लिइनेछ ।
प्रतिनिधिसभामा प्रतिनिधित्व गर्ने राष्ट्रिय स्वतन्त्र पार्टी (रास्वपा), नेपाली कांग्रेस, नेकपा (एमाले), नेपाली कम्युनिष्ट पार्टी, श्रम संस्कृति पार्टी र राष्ट्रिय प्रजातन्त्र पार्टीले राष्ट्रिय दलको मान्यता प्राप्त गरेका छन् ।
स्थानीय तहका वर्तमान जनप्रतिनिधिको कार्यकाल आगामी वैशाखमा सकिँदैछ । त्यसलाई मध्यनजर गर्दै आयोगले नयाँ निर्वाचनको मिति घोषणा तथा निर्वाचनसम्बन्धी आवश्यक गृहकार्य अघि बढाएको हो ।
राष्ट्रिय मान्यता प्राप्त दलहरूसँगको छलफलपछि आयोगले आफ्नो कार्यालयमा दर्ता भएका अन्य राजनीतिक दलहरूसँग पनि परामर्श गर्ने कार्यक्रम तय गरेको छ । यसबाट निर्वाचनको तयारी र व्यवस्थापनलाई थप प्रभावकारी बनाउने आयोगको अपेक्षा छ ।