काठमाडौँ । अविरल वर्षाका कारण आएको बाढी र पहिरोले काठमाडौँ उपत्यकासहित कोशी र बागमती प्रदेशका विभिन्न प्रमुख राजमार्ग तथा भित्री सडक खण्ड अवरुद्ध भएका छन्।
ललितपुरको कान्तिलोकपथअन्तर्गत बागमती गाउँपालिका–३ को भट्टेडाँडा, पाङदुर र टाकुर्चमा पहिरो खस्दा सडक पूर्ण रूपमा अवरुद्ध भएको छ।
त्यस्तै, खोटाङको हलेसीतुवाचुङ नगरपालिका–१ कदुवास्थित मध्यपहाडी सडक, पाँचथरको तुम्बेवा गाउँपालिका–२ स्थित नावाखोलामा तमोर करिडोर तथा याङवरक गाउँपालिका–२ को दोभाने खोलामा बाढी र पहिरोका कारण यातायात पूर्ण रूपमा ठप्प भएको छ।
लगातारको वर्षाका कारण सोलुखुम्बु, भोजपुर, इलाम, खोटाङ, उदयपुर र काभ्रेका विभिन्न राजमार्ग तथा सडकखण्डमा समेत बाढीपहिरोको जोखिम बढेको छ।
सम्भावित दुर्घटना तथा थप क्षति रोक्न ती जिल्लाका जोखिमयुक्त सडकखण्डमा निश्चित समय, विशेषगरी रातिको समयमा, सवारीसाधन सञ्चालनमा रोक लगाइएको सम्बन्धित निकायले जनाएका छन्।
