रूपन्देही । अविरल वर्षासँगै आएको पहिरोमा परी पाल्पामा दुई जनाको मृत्यु भएको छ भने तीन जना बेपत्ता भएका छन् । लगातारको वर्षाका कारण जिल्लाका विभिन्न स्थानमा बाढी र पहिरोको जोखिम बढेको छ ।
जिल्ला प्रहरी कार्यालय पाल्पाका अनुसार पहिरोमा परी माथागढी गाउँपालिका–२ रुप्से रजौलीका ७५ वर्षीय शेरबहादुर चिदी र रिब्दीकोट गाउँपालिका–६ ठिमुरेकी ५९ वर्षीया कृष्णकुमारी सारुको मृत्यु भएको हो ।
प्रहरी नायब उपरीक्षक विमल भट्टराईका अनुसार ठिमुरेमा पहिरोले घर पुरिएपछि कृष्णकुमारी बेपत्ता भएकी थिइन् । खोजी गर्ने क्रममा उनको शव फेला परेको हो ।
यस्तै, माथागढी गाउँपालिका–२ रुप्से रजौलीका शेरबहादुर चिदीको पनि पहिरोमा परी मृत्यु भएको प्रहरीले जनाएको छ । पहिरोका कारण जिल्लाका विभिन्न ग्रामीण सडक तथा बस्तीसमेत जोखिममा परेका छन् ।
यसैबीच, कालीगण्डकी नदीमा आएको बाढीले स्याङ्जा र गुल्मी जोड्ने पक्की पुल बगाएको छ । कालीगण्डकी जलविद्युत् आयोजनाको ड्याम नजिक रहेको उक्त पुल बाढीले बगाएको प्रहरीले जनाएको छ ।
बाढीका कारण पाल्पाको माडीफाँट डुबानमा परेको छ । झडेवा फाँटलगायतका क्षेत्रमा पानी पस्दा धानबालीमा समेत क्षति पुग्ने अवस्था देखिएको छ ।
माथागढी गाउँपालिका–४ झडेवाको देउगीर क्षेत्रमा जमिन चिरिएपछि दर्जनौँ घरपरिवार जोखिममा परेका छन् । गाउँपालिका अध्यक्ष यम चिदीका अनुसार जमिन चिरिन थालेपछि स्थानीयवासीलाई सुरक्षित स्थानमा सार्ने तयारी भइरहेको छ ।
लगातारको वर्षाका कारण पाल्पाका नदी तथा खोलानालामा पानीको सतहसमेत बढेको छ । बाढी, पहिरो र डुबानको जोखिमलाई मध्यनजर गर्दै स्थानीय तह तथा सुरक्षा निकायले सर्वसाधारणलाई सतर्क रहन आग्रह गरेका छन् ।
