सप्तरी– लगातारको वर्षापछि सप्तरीका हनुमाननगर कङ्कालिनी नगरपालिका र तिलाठी कोइलाडी गाउँपालिकाका विभिन्न बस्तीमा बाढी पसेपछि ५०० घर डुबानमा परेका छन्। बाढीका कारण दुई हजारभन्दा बढी परिवार प्रभावित भएका छन्।
हनुमाननगर कङ्कालिनी नगरपालिका–५, ७, १२ र १३ का बस्तीमा बाढी पस्दा ४८३ घर डुबानमा परेका छन्। यस्तै, तिलाठी कोइलाडी गाउँपालिका–४ र ५ मा १७ घर डुबानमा परेका छन्।
हनुमाननगर कङ्कालिनी नगरपालिकाका प्रमुख वीरेन्द्र माझीका अनुसार शुक्रबार राति सप्तकोशी नदीमा पानीको सतह बढेपछि बस्तीमा बाढी पसेको हो।
बाढी प्रभावितका लागि तत्काल बिहान र बेलुका दुई छाक खानाको व्यवस्था गरिएको उनले बताए। पानीको सतह केही घटेपछि प्रभावितको पहिचान गरी थप राहत सामग्री उपलब्ध गराइने नगर प्रमुख माझीले जानकारी दिए।
बागलुङका दर्जनौँ सडक अवरुद्ध, सदरमुकामसँग यातायात सम्पर्क प्रभावित
बागलुङ– लगातारको वर्षाका कारण बागलुङका दुई राष्ट्रिय राजमार्गसहित दर्जनौँ सडक अवरुद्ध भएका छन्। बाढीपहिरोका कारण सडक अवरुद्ध भएपछि जिल्लाका विभिन्न ग्रामीण बस्तीको सदरमुकाम बागलुङ बजारसँगको यातायात सम्पर्क प्रभावित भएको छ।
दुई दिनदेखि परेको अविरल वर्षाका कारण कालीगण्डकी करिडोर, मध्यपहाडी लोकमार्ग तथा विभिन्न शाखा र ग्रामीण सडकमा बाढीपहिरोले क्षति पुर्याएको हो।
गलकोटदेखि ताराखोला गाउँपालिका जोड्ने गलकोट–ताराखोला सडकअन्तर्गत गाईघाट झरना क्षेत्रमा ताराखोला नदीले पक्की सडक कटान गरेपछि शुक्रबारदेखि यातायात अवरुद्ध छ।
बागलुङ बजारदेखि तित्याङ, रायडाँडा हुँदै भकुण्डे जाने सडकको बागलुङ नगरपालिका–३ गौडाकोटमा पहिरो खसेपछि सडक बन्द भएको छ। बागलुङ नगरपालिका–१ रामरेखास्थित गणेशथान घुम्तीदेखि निरयघाट जाने सडकमा पनि पहिरो खसेर यातायात रोकिएको छ।
पहिरोका कारण बागलुङ बजारदेखि सिगाना हुँदै सायकोट जाने सडक अवरुद्ध भएको छ। यस्तै, बागलुङ बजार–दब्ल्याङ–बलेवा–कुश्मिसेरा मुख्य सडक अवरुद्ध भएपछि दक्षिण बागलुङसँगको यातायात सम्पर्क प्रभावित भएको छ।
बागलुङ बजारदेखि मुलपानी–तितौरे जाने सडकको तल्लो पात्लेमा पहिरो खसेर सडक पूर्ण रूपमा बन्द भएको छ। बरेङ जाने सडक, निसीखोलामा राजमार्गबाट गाउँ जोड्ने ग्रामीण सडक तथा ढोरपाटनका विभिन्न सडकमा समेत पहिरो खसेर यातायात अवरुद्ध भएको छ।
जिल्ला प्रहरी कार्यालय बागलुङका प्रहरी उपरीक्षक फणिन्द्र प्रसाईँका अनुसार वर्षाका कारण राष्ट्रिय राजमार्गदेखि ग्रामीण सडकसम्म प्रभावित भएका छन्। अवरुद्ध सडक खुलाउन सडक आयोजनाका प्रमुख, सडक डिभिजन कार्यालय, निर्माण व्यवसायी तथा स्थानीय तहसँग समन्वय भइरहेको उनले बताए।
