चितवन । बिहीबारदेखि परेको अविरल वर्षाका कारण विभिन्न स्थानमा पहिरो खस्नुका साथै थप जोखिम बढेपछि पृथ्वी राजमार्ग र नारायणगढ–मुग्लिन सडकखण्ड अर्को सूचना जारी नभएसम्मका लागि पूर्ण रूपमा बन्द गरिएको छ।
चितवनका प्रमुख जिल्ला अधिकारी गणेश अर्यालका अनुसार बिहीबार राति ८ बजेदेखि आज बिहान ५ बजेसम्म सवारी आवागमन रोक्ने निर्णय गरिएको थियो। तर, निरन्तर वर्षा भइरहेकाले सडकमा थप जोखिम बढ्न सक्ने भन्दै अर्को सूचना जारी नभएसम्मका लागि आवागमन बन्द राखिएको हो।
उनका अनुसार पृथ्वी राजमार्गका विभिन्न स्थानमा पहिरो खसेको र वर्षा नरोकिएकाले यात्रु तथा सवारीसाधनको सुरक्षालाई ध्यानमा राख्दै चितवन खण्डमा आवागमन रोकिएको हो।
पृथ्वी राजमार्ग र नारायणगढ–मुग्लिन सडक देशकै प्रमुख राजमार्गमध्ये पर्छन्। नारायणगढ–मुग्लिन सडक हुँदै दैनिक १० हजारभन्दा बढी तथा पृथ्वी राजमार्ग हुँदै १४ हजारभन्दा बढी सवारीसाधन आवतजावत गर्ने गरेका छन्।
सडक बन्द भएपछि दुवै राजमार्गमा ठूलो संख्यामा सवारीसाधन रोकिएका छन् भने हजारौँ यात्रु बाटोमै अलपत्र परेका छन्।
