काठमाडौँ। नेकपा एमालेका अध्यक्ष केपी शर्मा ओलीले गत भदौ २३ र २४ गते भएको उपद्रवमा को–को संलग्न थिए भन्ने कुरा बिस्तारै खुल्दै गएको बताएका छन्। उनले केही शक्तिहरू नेपाललाई पुनः अराजकता र अन्धकारतर्फ धकेल्ने प्रयासमा सक्रिय रहेको आरोप लगाए।
संविधान दिवसका अवसरमा शनिबार एमाले केन्द्रीय कार्यालय च्यासलमा आयोजित कार्यक्रममा ओलीले मुलुक विधि, पद्धति र प्रक्रियाबाट नभई बलजफ्तीका आधारमा चलाउने प्रयास भइरहेको बताए। अराजकताले हिंसा, अकर्मण्यता, गैरजिम्मेवारपन र दिशाहीनता निम्त्याउने उनको भनाइ थियो।
‘अहिले को–को संलग्न थिए, के–के संलग्न थिए, खुल्दै गएका छन्, बोल्दै गएका छन्, छाप्दै गएका छन्, लेख्दै गएका छन्,’ ओलीले भने।
उनले गत भदौ २३ र २४ गतेको उपद्रव संविधान र लोकतान्त्रिक विधि तथा प्रणाली तोड्ने उद्देश्यले गरिएको दाबी गरे। नेपाललाई ‘कुबोटो’तर्फ धकेल्न विभिन्न शक्तिहरू सक्रिय रहेको उनको आरोप थियो।
ओलीले निर्वाचनको मौन अवधिमा बीबीसीले नेपालबारे ‘झुटो कुरा’ सम्प्रेषण गरेर जनतालाई भ्रमित पारेको आरोप पनि लगाए। स्थापित अन्तर्राष्ट्रिय सञ्चारमाध्यमसमेत नेपालमा असत्य फैलाएर जनतालाई दिग्भ्रमित गर्ने प्रयासमा लागेको उनले जिकिर गरे।
