ललितपुर । नेपाली कांग्रेसका सभापति गगन थापाले प्रतिपक्षमा रहेको कांग्रेसले जनसरोकारका विषय संसदमा प्रभावकारी रूपमा उठाउन पार्टीका नेता–कार्यकर्ता समसामयिक विषयमा सुसूचित हुनुपर्ने बताएका छन् ।
आइतबार ललितपुरको सानेपास्थित पार्टी केन्द्रीय कार्यालयमा आयोजित ‘सुवर्ण शम्शेर इकोनोमिक सिरिज’मा बोल्दै थापाले संसदीय जिम्मेवारी प्रभावकारी रूपमा निर्वाह गर्न र नीतिगत विषयमा स्पष्ट हुन यस्ता छलफल आवश्यक रहेको बताए ।
पार्टीका नेता–कार्यकर्ता बौद्धिक तथा समसामयिक विषयमा जानकार हुनुपर्नेमा जोड दिँदै उनले नयाँ विषयवस्तुबारे निरन्तर जानकारी लिनुपर्ने बताए । यस्ता छलफलले कार्यकर्तामा विषयगत जिज्ञासा र रुचि बढाउनुका साथै व्यापक दृष्टिकोण बनाउन सहयोग पुग्ने उनको भनाइ थियो ।
‘हामी अहिले प्रतिपक्षको जिम्मेवारीमा छौँ र संसदमा हाम्रा केही निश्चित उत्तरदायित्वहरू छन् । ती जिम्मेवारीलाई कसरी कुशलतापूर्वक निर्वाह गर्ने भन्ने विषयमा गम्भीर छलफल आवश्यक छ,’ थापाले भने ।
कार्यक्रममा उठेका विषय र प्राप्त सुझावलाई संसदमा पुर्याइने पनि थापाले बताए ।
