काठमाडौं। नेपाली कम्युनिस्ट पार्टीका नेता तथा पूर्वप्रधानमन्त्री झलनाथ खनालले राष्ट्रिय स्वतन्त्र पार्टी (रास्वपा)लाई ‘दलाल पुँजीपति वर्गको मुख्य प्रतिनिधि’ भएको टिप्पणी गरेका छन्। उनले वर्तमान सत्ता जनविरोधी दिशामा अघि बढिरहेको दाबीसमेत गरे।
शनिबार पार्टीको कोशी प्रदेश समितिले आयोजना गरेको पार्टी एकता तथा प्रशिक्षण कार्यक्रममा खनालले २०६२/६३ को परिवर्तनपछि नेपाली कांग्रेस दलाल पुँजीपति वर्गको मुख्य प्रतिनिधिका रूपमा रहेकोमा अहिले रास्वपा त्यस्तो शक्तिका रूपमा अघि आएको बताए। संसदीय व्यवस्थामा रास्वपा कम्युनिस्ट शक्तिको ‘मुख्य प्रतिद्वन्द्वी’का रूपमा देखिएको उनको भनाइ थियो।
‘अहिले त्योभन्दा बढी रास्वपा दलाल पुँजीपति वर्गको मुख्य प्रतिनिधि भएर प्रकट भएको छ र सत्ता उसको हातमा छ,’ खनालले भने।
सरकारको नीति, कार्यक्रम र बजेट आम जनता तथा तल्लो वर्गको हितमा नभएको आरोप लगाउँदै खनालले आर्थिक नीति माथिल्लो वर्गकेन्द्रित रहेको दाबी गरे। जनतामाथि करको भार थपिएको र त्यसबाट तल्लो वर्ग प्रभावित भएको उनको भनाइ थियो।
उनले सरकारका नीतिका कारण सुकुम्बासी, विद्यार्थी, मजदुर र पत्रकार समस्यामा परेको दाबी गरे। वर्तमान सरकारले जनताको हितमा काम गर्न नसक्ने उनको आरोप थियो।
पछिल्लो निर्वाचनमा कम्युनिस्ट शक्तिले व्यहोरेको पराजयलाई सामान्य हारका रूपमा लिन नहुने भन्दै खनालले त्यसका लागि नेतृत्वका विगतका कमजोरी जिम्मेवार रहेको बताए। बाह्य शक्तिको प्रभाव भए पनि त्यसलाई गौण कारणका रूपमा हेर्नुपर्ने उनको भनाइ थियो।
कम्युनिस्ट पार्टीसँग जोडिएका कार्यकर्ता र समर्थकमा नेतृत्वप्रति असन्तुष्टि बढेको तथा विदेशिएका श्रमिक र असन्तुष्ट जनतालाई विभिन्न शक्तिले आफ्नो पक्षमा परिचालन गरेको उनले दाबी गरे।
कम्युनिस्ट शक्तिहरू एकताबद्ध भएर विगतका कमजोरी सच्याउँदै समाजवादी रूपान्तरणको आन्दोलन अघि बढाउनुपर्नेमा खनालले जोड दिए। विगतका कमजोरी सच्याएर नयाँ ढंगले अघि बढे कम्युनिस्ट शक्तिले पुनः सफलता हासिल गर्न सक्ने उनको भनाइ थियो।
