काठमाडौं । राष्ट्रिय सभाको शून्य समयमा सांसदहरूले एलपी ग्यासको अभाव, बाढीपहिरोबाट भएको जनधनको क्षति तथा समसामयिक राजनीतिक र सामाजिक विषयमा सरकारको ध्यानाकर्षण गराएका छन् । रास्वपा सांसद खगेन्द्र सुनारको अभिव्यक्तिप्रति आपत्ति जनाउँदै कारबाहीको मागसमेत गरिएको छ ।
सांसद चन्द्रबहादुर केसीले लेखा समितिको बैठकमा प्रहरी महानिरीक्षक दानबहादुर कार्कीलाई लक्षित गरी सुनारले दिएको अभिव्यक्तिप्रति आपत्ति जनाए । उनले सम्बन्धित दललाई कारबाही गर्न माग गर्दै प्रधानमन्त्रीको सीमा सम्बन्धी विवादास्पद अभिव्यक्ति संसद्को अभिलेखबाट हटाउनसमेत आग्रह गरे ।
सांसद गीता देवकोटाले बजारमा ग्यासको नियमित आयात भइरहेको भनिए पनि सर्वसाधारणले घण्टौँ लाइन बस्दा पनि नपाएको बताइन् । उनले पारदर्शी वितरण प्रणाली लागू गर्न र कालोबजारी नियन्त्रण गर्न सरकारलाई रुलिङ गर्न माग गरिन् । रञ्जित कर्णले ग्यासको विकल्पका रूपमा विद्युतीय चुलो प्रयोग गर्न खोज्दा ट्रान्सफर्मरले नधान्ने र दाउरा खोज्न वन ऐनले रोक्ने अवस्था रहेको बताए ।
रोशनी मेचेले झन्डै दुईतिहाइको सरकार हुँदा पनि नागरिकले आधारभूत आवश्यकताका लागि सास्ती भोग्नुपरेको भन्दै सदनमा जवाफ दिन सरकारसँग माग गरिन् ।
सांसद मीना सिंह राखालले २८ साउनदेखि परेको अविरल वर्षाका कारण रोल्पाको थवाङ र जाजरकोटको भेरी नगरपालिकामा पहिरो जाँदा ठूलो जनधनको क्षति भएको जानकारी दिइन् । उनका अनुसार थवाङमा ११ घर पुरिएका छन् भने १३ जना बेपत्ता छन् । हालसम्म चार जनाको शव फेला परेको उनले बताइन् ।
वासुदेव घिमिरेले विपद् प्रभावितलाई निःशुल्क उपचार र विस्थापित परिवारलाई तत्काल राहतको व्यवस्था गर्न माग गरे ।
रामकुमारी झाँक्रीले सार्वजनिक पद धारण गरेका व्यक्तिमाथि सामाजिक सञ्जाल र सञ्चारमाध्यमबाट भइरहेको ‘डिफेमिङ’ तथा लाञ्छनाप्रति चिन्ता व्यक्त गरिन् । प्रतिष्ठित व्यक्तिको चरित्र हत्या गर्ने प्रवृत्तिले सामाजिक मर्यादामा ह्रास ल्याएको उनको भनाइ थियो ।
