काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछानेले सरकारले आफ्नो वाचा र लक्ष्यअनुसार काम नगरे हस्तक्षेप गरी सही बाटोमा ल्याउने बताएका छन्। सरकार अहिले असफल भइनसकेको र त्यस्तो अवस्था आउन नदिनेमा आफूहरू सचेत रहेको उनले बताए।
सरकारको कार्यशैली र स्थायित्वबारे टिप्पणी गर्दै लामिछानेले सरकार आफ्नो ‘लिक’बाट बाहिरिए राजनीतिक दलका रूपमा नियन्त्रण र हस्तक्षेप गर्ने क्षमता रास्वपासँग रहेको उल्लेख गरे। “काम गर्न सकेन वा बाटो बिरायो भने सरकारलाई सही बाटोमा ल्याउने राजनीतिक पार्टी हामीसँग छ,” उनले भने।
सरकार सञ्चालनलाई हवाई यात्रासँग तुलना गर्दै लामिछानेले यात्राका क्रममा कहिलेकाहीँ आउने ‘टर्बुलेन्स’बाट नआत्तिन आग्रह गरे। “बादलका टुक्राबीच जहाज हिँड्दा जहाज हल्लिन सक्छ,” उनले भने, “तर जहाज हल्लिँदैमा दुर्घटना हुन्छ कि भनेर डराउनुपर्दैन।”
लामिछानेले सरकार सही दिशाबाट विचलित भए पुनः सही मार्गमा ल्याइने र यात्रालाई गन्तव्यसम्म पुर्याइने बताए। “सिट ब्याक एन्ड रिल्याक्स,” उनले भने, “हामी यो यात्रालाई सुरक्षित रूपमा गन्तव्यमा पुर्याउँछौँ।”
