काठमाडौं । उज्यालो नेपाल पार्टीका अध्यक्ष कुलमान घिसिङले मन्त्रीहरूले आवश्यकता भन्दा धेरै स्वकीय सचिव र सल्लाहकार राख्दा मन्त्रालयमा कर्मचारीलाई बस्ने ठाउँसमेत अभाव भएको गुनासो आएको बताएका छन्।
मंगलबार आयोजित पत्रकार सम्मेलनमा उनले केही मन्त्रीहरूले पाँचदेखि सात जनासम्म तलबसहितका स्वकीय सचिव र दर्जनौं तलबविनाका सल्लाहकार राखेको आरोप लगाए। सरकारले मन्त्रालयको संख्या घटाएर खर्च कटौती गर्ने नीति लिएको भए पनि स्वकीय र सल्लाहकारको संख्या बढाउँदा उल्टै सरकारी खर्च बढ्ने र प्रशासनिक अनुशासन कमजोर हुने उनले बताए।
मन्त्रालयका कर्मचारीबाट आफूले गुनासो सुनेको उल्लेख गर्दै घिसिङले स्वकीय सचिव र सल्लाहकारले मन्त्रालयका फ्लोर नै भरिँदा सहसचिवसहित कर्मचारीलाई बस्ने ठाउँसमेत अभाव भएको दाबी गरे।
‘मन्त्रीहरूले पाँच–सात जनासम्म तलब दिएर स्वकीय राखेका छन्, तलब नदिई राखेका २०–३० जना छन् रे। मन्त्रालयमा सहसचिव र कर्मचारीलाई बस्ने ठाउँ छैन, तर स्वकीय र सल्लाहकारले फ्लोर नै भरिएको भन्ने सुनेको छु। यो राम्रो विषय होइन, सरकारले गम्भीर समीक्षा गर्नुपर्छ,’ उनले भने।
स्वकीय र सल्लाहकारमार्फत कर्मचारीतन्त्रमाथि बढ्दो हस्तक्षेपले ब्युरोक्रेसीको मनोबल कमजोर हुने र सुशासनमा असर पर्ने उनको भनाइ थियो। उनले आफू मन्त्री हुँदा तीनवटा मन्त्रालय सम्हाल्दा तलबसहित एक जना स्वकीय सचिव र बिना पारिश्रमिक एक जना सल्लाहकार मात्र राखेको उल्लेख गरे।
घिसिङले सांसदलाई स्वकीय सचिव उपलब्ध गराउने व्यवस्थाप्रति पनि प्रश्न उठाए। कार्यक्षमता बढाउने उद्देश्य भए व्यवस्था सकारात्मक हुन सक्ने भए पनि व्यवहारमा अधिकांशले आफ्ना निकटका व्यक्तिलाई रोजगारी दिलाउने माध्यम बनाएको उनको आरोप थियो। सांसदले आवश्यक परे आफ्नै तलबभित्रबाट स्वकीय सचिव राख्न सक्नुपर्ने र मन्त्रीका हकमा पनि सीमित संख्याभन्दा बढी स्वकीय तथा सल्लाहकार राख्ने प्रवृत्ति अन्त्य गर्नुपर्ने उनले बताए।
