काठमाडौं । नेकपा (एमाले) का महासचिव शंकर पोखरेलले लोकरिझ्याइँ (पपुलिजम), अवसरवाद र अराजकतावादको जगमा उभिएका नयाँ राजनीतिक शक्तिको आयु लामो नहुने दाबी गरेका छन् । प्रधानमन्त्री बालेन्द्र साह नेतृत्वको सरकार र राष्ट्रिय स्वतन्त्र पार्टी (रास्वपा) लाई लक्षित गर्दै उनले यस्ता शक्तिको उदय जति छिटो हुन्छ, पतन पनि त्यत्तिकै नाटकीय हुने टिप्पणी गरे ।
नरबहादुर कर्माचार्यको स्मृति दिवसका अवसरमा शनिबार काठमाडौंमा आयोजित कार्यक्रममा बोल्दै पोखरेलले अहिले देखिएका नयाँ राजनीतिक शक्तिहरू अवसरवाद र अराजकतावादको आधारमा स्थापित भएको आरोप लगाए । उनले ती शक्तिको असफलता निश्चित भए पनि त्यसपछि जनमत स्वतः परम्परागत राजनीतिक दलतर्फ फर्किहाल्छ भन्नेमा ढुक्क हुन नहुने बताए ।
‘आज बालेन्द्र सरकार पपुलिजम, एनार्किजम र अपर्चुनिजमको जगमा जसरी खडा भएको छ, त्यो लामो समयसम्म टिक्दैन भन्ने मलाई लाग्छ । कुनै पनि शक्ति जति छिटो उदाउँछ, त्यसको पतन पनि त्यति नै छिटो हुने सम्भावना रहन्छ । उनीहरू जसरी नाटकीय रूपमा नेपालको राजनीतिमा स्थापित भएका छन्, पतन पनि त्यत्तिकै नाटकीय हुन्छ,’ उनले भने ।
पोखरेलले नयाँ शक्तिको असफलतापछि सिर्जना हुने राजनीतिक रिक्ततालाई कसरी व्यवस्थापन गर्ने भन्ने नै अहिलेको मुख्य चुनौती भएको बताए । उनका अनुसार रास्वपाको असफलतापछि जनमत स्वतः एमालेलगायतका दलतर्फ फर्किहाल्छ भन्ने अपेक्षा गर्नु पर्याप्त हुँदैन ।
‘रास्वपाको असफलतापछि जनमत स्वतः फेरि हामीतिर फर्कन्छ भन्ने कुरामा ढुक्क भएर बस्ने हो भने, त्यो नफर्कन पनि सक्छ,’ उनले भने ।
पार्टीप्रति युवा पुस्ताको आकर्षण घट्दै गएको स्वीकार गर्दै पोखरेलले एमालेका कार्यक्रमहरूमा अधिकांश पाका अनुहार मात्रै देखिन थालेको बताए। युवा पुस्तालाई मूलधारका राजनीतिक दलसँग जोड्न नसके नयाँ शक्तिको पतनपछि सिर्जना हुने राजनीतिक अवसरसमेत उपयोग गर्न नसकिने उनको भनाइ थियो ।
‘हामी हाम्रा हरेक कार्यक्रमहरूमा अनुहार हेर्दा पाका अनुहार नै बढी देख्छौँ । त्यस अर्थमा आजको युवा पुस्तातर्फ विशेष ध्यान दिनुपर्छ,’ उनले भने।
पोखरेलले पपुलिजमको असफलतापछि बन्ने राजनीतिक परिस्थितिलाई सही दिशा दिन मूलधारका राजनीतिक दलहरूले समयमै तयारी र रणनीति बनाउनुपर्नेमा जोड दिए ।
