काठमाडौं ।सरकारले सबै मित्रराष्ट्रहरूसँगको सम्बन्धलाई अझ सुदृढ र प्रगाढ बनाउन आवश्यकताअनुसार उच्चस्तरीय भ्रमणलाई निरन्तरता दिने नीति लिएको जनाएको छ।
शुक्रबार परराष्ट्र मन्त्रालयमा आयोजित नियमित पत्रकार सम्मेलनमा मन्त्रालयका सहसचिव तथा प्रवक्ता लोकबहादुर पौडेल क्षेत्रीले प्रचलित कूटनीतिक अभ्यासअनुसार सरकारले विभिन्न उच्चस्तरीय भ्रमणको तयारी गरिरहेको जानकारी दिए।
राष्ट्रिय स्वतन्त्र पार्टी (रास्वपा)का सभापति रवि लामिछानेको सम्भावित चीन भ्रमणबारे बोल्दै उनले सम्बन्धित दलको अनुरोध प्राप्त भएमा परराष्ट्र मन्त्रालयले आवश्यक कूटनीतिक सहजीकरण गर्न तयार रहेको बताए।
उनका अनुसार राजनीतिक दलहरूबीच हुने भ्रमण तथा आदानप्रदान सम्बन्धित दलहरूको विषय भए पनि कूटनीतिक समन्वय आवश्यक परेमा सम्बन्धित दलको अनुरोधका आधारमा मन्त्रालयले आवश्यक सहयोग उपलब्ध गराउनेछ।
पत्रकार सम्मेलनमा सोधिएको अर्को प्रश्नको जवाफ दिँदै प्रवक्ता क्षेत्रीले प्रधानमन्त्री बालेन्द्र शाहका प्रमुख सल्लाहकार कुमार वेनको भारत भ्रमणबारे मन्त्रालयलाई कुनै जानकारी नभएको बताए।
यसैगरी, उनले सांस्कृतिक कूटनीति प्रत्येक देशको विदेश नीतिको महत्त्वपूर्ण पक्ष रहेको उल्लेख गर्दै सरकारले यस क्षेत्रलाई अझ प्रभावकारी र सुदृढ बनाउने नीति अवलम्बन गरेको जानकारी दिए।
