काठमाडौँ । लुम्बिनी प्रदेश सरकारको मन्त्रिपरिषद् पुनर्गठन गरिएको छ। जसअन्तर्गत पाँच जना नयाँ मन्त्रीलाई जिम्मेवारी दिइएको छ।
मुख्यमन्त्री चेतनारायण आचार्यले नेपालको संविधानको धारा १६८ को उपधारा (९) अनुसार मन्त्रिपरिषद् पुनर्गठनका लागि प्रदेश प्रमुखसमक्ष सिफारिस गरेका हुन्। सोही सिफारिसका आधारमा नयाँ मन्त्रीहरू नियुक्त गरिएको जनाइएको छ।
पुनर्गठित मन्त्रिपरिषदमा नेकपा (एमाले) बाट चार जना तथा जनता समाजवादी पार्टी (जसपा) बाट एक जना मन्त्री समावेश भएका छन्।
एमालेका तर्फबाट तुलसीप्रसाद चौधरीलाई कृषि, भूमि व्यवस्था तथा सहकारी मन्त्रालय, रामजी प्रसाद घिमिरेलाई स्वास्थ्य मन्त्रालय, रत्नबहादुर खत्रीलाई भौतिक पूर्वाधार विकास मन्त्रालय तथा डिल्लीराज भुसाललाई ऊर्जा, जलस्रोत तथा सिँचाइ मन्त्रालयको जिम्मेवारी तोकिएको छ।
त्यसैगरी जसपाका भण्डारीलाल अहिरलाई आन्तरिक मामिला तथा कानुन मन्त्रालयको जिम्मेवारी प्रदान गरिएको छ। यसअघि उक्त मन्त्रालयको नेतृत्व जसपाकै आदेशकुमार अग्रवालले गर्दै आएका थिए, जसलाई यसपटक परिवर्तन गरिएको हो।
नवनियुक्त मन्त्रीहरूको शपथग्रहण आउँदो जेठ २५ गते सोमबारका लागि तय गरिएको प्रदेश सरकार स्रोतले जनाएको छ।
