काठमाडौँ । राष्ट्रिय परीक्षा बोर्डले कक्षा १२ को परीक्षाफल परीक्षा सम्पन्न भएको ४५ दिनभित्र सार्वजनिक गर्ने तयारी अघि बढाएको छ।
नतिजा प्रकाशन प्रक्रियालाई तीव्र बनाउँदै बोर्डले मूल्यांकन तथा तथ्यांक व्यवस्थापनको काम द्रुत गतिमा सञ्चालन गरिरहेको जनाएको छ।
परीक्षा सम्पन्न भएको करिब दुई साताको अवधिमै नतिजासम्बन्धी आधाभन्दा बढी काम सम्पन्न भइसकेको बोर्डले जनाएको छ। हाल उत्तर पुस्तिका परीक्षणको कार्य ५० प्रतिशतभन्दा बढी सकिएको जानकारी दिइएको छ।
बोर्डका अनुसार परीक्षण सम्पन्न भएका उत्तरपुस्तिकाको प्राप्तांक सम्परीक्षण गरी कम्प्युटर प्रणालीमा प्रविष्ट गर्ने कामसमेत सँगसँगै भइरहेको छ।
जुन विषयको परीक्षण सकिन्छ, त्यसको सम्परीक्षण र तथ्यांक प्रविष्टिको काम तत्कालै अघि बढाइएकाले नतिजा प्रकाशन प्रक्रिया छरितो हुने अपेक्षा गरिएको छ।
नतिजा सार्वजनिक गर्न ढिलाइ नहोस् भन्ने उद्देश्यले परीक्षा सकिएकै दिनदेखि उत्तर पुस्तिका परीक्षण सुरु गरिएको बोर्डले जनाएको छ। हाल देशभरका ४२ वटा परीक्षण केन्द्रमार्फत उत्तर पुस्तिका मूल्याङ्कन कार्य भइरहेको छ।
यस वर्ष कक्षा १२ परीक्षामा देशभरबाट करिब ४ लाख १८ हजार विद्यार्थी सहभागी भएका थिए।
यसअघि राष्ट्रिय परीक्षा बोर्डले माध्यमिक शिक्षा परीक्षा (एसइई) को नतिजा पनि परीक्षा सम्पन्न भएको २९ दिनमै सार्वजनिक गरेको थियो।
