काठमाडौं । शिक्षा तथा खेलकुद मन्त्रालयले गत भदौ १० गतेको विनाशकारी बाढीमा परी अभिभावक गुमाएका तथा बेपत्ता भएका व्यक्तिका सन्तानलाई उच्च शिक्षासम्म पूर्ण छात्रवृत्ति उपलब्ध गराउने प्रक्रिया अघि बढाएको छ ।
मन्त्रालयले मन्त्रीस्तरीय निर्णय गर्दै पहिलो चरणमा २७ जना विद्यार्थीलाई छात्रवृत्ति प्रदान गर्ने निर्णय गरेको हो । आगामी दिनमा थप प्रभावित विद्यार्थीको पहिचान गरी विभिन्न चरणमा छात्रवृत्ति उपलब्ध गराइने मन्त्रालयले जनाएको छ ।
यसअघि मन्त्रालयले ‘सुनिश्चित भविष्य छात्रवृत्ति योजना सञ्चालन निर्देशिका, २०८३’ स्वीकृत गरी बाढीमा अभिभावक गुमाएका वा बेपत्ता भएका व्यक्तिका सन्तानलाई विद्यालय तहसम्म निःशुल्क शिक्षा प्रदान गर्ने व्यवस्था कार्यान्वयनमा ल्याइसकेको छ ।
सोही व्यवस्थालाई विस्तार गर्दै उच्च शिक्षामा समेत छात्रवृत्ति उपलब्ध गराउने निर्णय गरिएको शिक्षा तथा खेलकुदमन्त्री सस्मित पोखरेलले जानकारी दिए ।
‘पहिलो चरणमा २७ जनालाई छात्रवृत्ति दिइनेछ । त्यसपछि पनि विद्यार्थीको पहिचान गर्दै क्रमशः विभिन्न चरणमा छात्रवृत्ति उपलब्ध गराउँदै जानेछौँ,’ मन्त्री पोखरेलले भने ।
निर्णयअनुसार निजी विद्यालयमा अध्ययनरत विद्यार्थीको अभिलेख शिक्षा विभागले राख्नेछ । त्यसका लागि सम्बन्धित छाता संस्था र स्थानीय तहलाई पत्राचार गरिनेछ । सामुदायिक विद्यालयमा अध्ययनरत विद्यार्थीका हकमा भने सम्बन्धित स्थानीय तहलाई आवश्यक समन्वयका लागि पत्राचार गरिने मन्त्रालयले जनाएको छ ।
त्यसैगरी उच्च शिक्षा अध्ययन गरिरहेका विद्यार्थीलाई विश्वविद्यालय तथा क्याम्पसमा नियमित रूपमा उपलब्ध छात्रवृत्ति कोटामा थप गरी समावेश गर्न निर्देशन दिइएको छ । यसका लागि विश्वविद्यालय अनुदान आयोगमार्फत आवश्यक व्यवस्था मिलाइनेछ ।
मन्त्रालयको यस निर्णयसँगै भोटेकोशी बाढीमा अभिभावक गुमाएका तथा बेपत्ता भएका व्यक्तिका सन्तानले विद्यालय तहदेखि उच्च शिक्षासम्म निःशुल्क अध्ययनको अवसर पाउने भएका छन् ।
