काठमाडौँ । काठमाडौँ महानगरपालिकाका मेयर बालेन साहले जाँचबुझ आयोगमा लिखित जवाफ पठाएका छन् ।
गत भदौ २३ र २४ गते भएको जेन जेड आन्दोलनबारे बुझ्नका लागि आयोगले मेयर साहलाई लिखित पत्र पठाएको थियो ।उक्त पत्रको जवाफ साहले पठाएको आयोगले जनाएको छ ।
आयोगले बयान लगायतका काम सकेर अब प्रतिवेदन लेखनको काम अघि बढाएको छ । आयोगले गतसाता गृहमन्त्री रमेश लेखकको लिखित वक्तव्य र बयान लिएको थियो ।
आयोगले यसअघि नै जेन जेड आन्दोलनसँग सम्बन्धित विवरण र अरू तथ्यांकहरू संकलन गरेको थियो । तल्ला तहका सुरक्षा अधिकारीहरूसँगको बयानपछि आयोगले काठमाडौँका तत्कालीन प्रहरी प्रमुख, उपत्यका प्रहरी कार्यालय, प्रहरी मुख्यालयका उच्चपदस्थ अधिकारीहरूसँग बयान लिएको थियो ।
त्यसबाहेक सशस्त्र र राष्ट्रिय अनुसन्धान विभागका साथै काठमाडौँका प्रमुख जिल्ला अधिकारी, तत्कालीन गृहसचिव, मुख्यसचिव लगायतसँग पनि आयोगले बयान लिएको छ ।
प्रधानसेनापति अशोकराज सिग्देलले पनि आफ्ना अधिकारीहरूका साथमा आयोगमा पुगेर बयान दिएका थिए । आयोगले सुरुमै पूर्वगृहमन्त्री रवि लामिछाने लगायतसँग बयान लिएको थियो ।
