मोरङका दुई वेग्लावेग्लै स्थानमा बिहीबार राति दुई महिलामाथि सामूहिक बलात्कार भएको छ । विराटनगर महानगरपालिका र जहदा गाउँपालिकामा सामूहिक बलात्कार भएको हो ।
जिल्ला प्रहरी कार्यालय, मोरङका अनुसार विराटनगरमा किशोरी र जहदामा महिलामाथि सामूहिक बलात्कार भएको छ । मोरङ प्रहरीका प्रवक्ता डिएसपी दीपक श्रेष्ठका अनुसार १८ वर्षीया युवतीमाथि विराटनगर-१४ जतुवामा ५ जनाले सामूहिक बलात्कार गरेका थिए ।
विराटनगरमा सामूहिक बलात्कारमा परेकी किशोरीको उमेर १८ वर्ष छ । उनी बर्थडे मनाएर घर फर्किदैँ गर्दा भदौ १६ गते राती ९ :४५ बजे विराटनगर १४ नहरमा पाँच जना युवाले सामूहिक बलात्कार गरेका हुन् ।
साथीसँग जन्मदिन मनाएर घर आउँदै गरेकी ती किशोरीलाई पाँच जना युवाले सामूहिक बलात्कार गरेको प्रारम्भिक चरणको अनुसन्धानबाट खुलेको मोरङ प्रहरीका प्रवक्ता श्रेष्ठले बताए । प्रहरीले घटनामा संलग्न एक जनालाई पक्राउ गरेको छ । पक्राउ पर्नेमा विराटनगर ४ इकराइका २९ वर्षीय सन्तोष मण्डल रहेका छन् । अन्य थप चार जना फरार छन् । फरारको खोजी कार्य तीव्र बनाएको प्रहरीले जनाएको छ ।
बलात्कारको सिकारमा परेकीमा किशोरीले विराटनगरको एक होटेलमा जन्मदिन मनाएर घर फिर्किने क्रममा उनीमाथि बलात्कार भएको प्रहरीले जनाएको छ ।
जन्मदिन मनाएपछि ती किशोरीलाई प्रेमिले घर पुर्याउन मोटरसाइकलमा हालेर लगेका थिए । घर पुग्नुभन्दा अगाडी उनीहरू विराटनगर १४ जतुवा अगाडीको नहरमा गफ गरेर बसेका थिए । प्रेमी र प्रेमिका गफ गरेर बसिरहेका बेला पाँच जनाको समूहले नियन्त्रणमा लिएर युवतीलाई बलात्कार गरेको प्रहरीले जनाएको छ ।
‘गफ गरेर बसिरहेका बेला मादक पदार्थ सेवन (मापसे) गरी राति आएका युवाहरूले केटालाई नियन्त्रणमा लिएछन् । दुई जना केटाले नियन्त्रणमा लिएपछि तीन जनाले पालैपालो बलात्कार गरेको खुलेको छ,’ अनुसन्धानमा संलग्न एक प्रहरी अधिकृतले भने, ‘त्यसपछि उक्त समूहको नियन्त्रणबाट युवा उम्किएर भाग्न सफल भए । तर भाग्न खोजे पनि लखेट्दै गएर युवतीलाई भने आफ्नो कब्जामा लिँदै सामूहिक बलात्कार गरेको पाइयो ।’
भाग्न सफल भएका युवाले गाउँमा गएर होहल्ला गरे । स्थानीय भेला जम्मा हुन थालेपछि बलात्कारमा संलग्नहरू युवतीलाई छाडेर घटनास्थलबाट फरार बनेको प्रहरीले जनाएको छ । प्रहरीका अनुसार कुटपिटबाट युवा र युवतीको टाउको, अनुहार, कुहिना लगायत शरीरका विभिन्न भागमा चोट लागेको छ । उनीहरूको विराटनगरस्थित कोशी अस्पतालमा उपचार गरिएको छ ।
त्यस्तै मोरङको जहदा गाउँपालिका–७ मा २ जना युवाले महिलामाथि सामूहिक बलात्कार गरेको प्रहरीले बताएको छ । राति १० बजे अन्दाजी ३५ वर्षीया महिलालाई चिनजानकै युवाले करणी गरेको प्रारम्भिक अनुसन्धानमा खुलेको छ ।
राति १० बजे घरबाट काम छ भन्दै बोलाएका युवाले घर नजिकै खेतमा लगेर सामूहिक बलात्कार गरेको प्रहरीको भनाइ छ । घरमा फर्किएर महिलाले आफ्ना पतिलाई सुनाएपछि घटना सार्वजनिक भएको हो ।
घटनामा संलग्न भएको आरोपमा जहदा–७ का २४ वर्षीय डोमा भनिने राहुल साह र २८ वर्षीय सञ्जय सोरेनलाई पक्राउ परेका छन् । पक्राउ परेकाहरुमाथि करण सम्बन्धी कसूरमा जिल्ला अदालत मोरङबाट म्याद थप गरेर विस्तृत अनुसन्धान भइरहेको बताइएको छ ।