नेकपा राष्ट्रिय एकता अभियानका संयोजक वामदेव गौतम र नेपाल समाजवादी पार्टी संयुक्तका अध्यक्ष डा बाबुराम भट्टराई आसन्न निर्वाचनमा नेकपा (माओवादी केन्द्र)को चुनाव चिन्हबाट निर्वाचन लडने भएका छन् ।
नेकपा माओवादी केन्द्रको मंगलबार बसेको स्थायी कमिटी बैठकले गौतम र भट्टराईलाई आफ्नो चुनाव चिन्हबाट लड्ने अनुमति दिएको छ ।
गौतम प्युठान वा बर्दिया कहाँबाट लडने भन्ने बारेमा टुंगोमा लाग्न बाँकि छ । भट्टराई भने गोरखा क्षेत्र नम्बर २ बाट चुनाव लड्नेछन् । अघिल्लोपटक गोरखा क्षेत्र नम्बर २ मा तात्कालिन नयाँ शक्ति पार्टीका संयोजक डा. बाबुराम भट्टराई ३१,८०७ मतका साथ निर्वाचित हुँदा माओवादी केन्द्रका नारायणकाजी श्रेष्ठले २४,९३३ मत पाएका थिए । प्रतिनिधि सभा निर्वाचनमा भट्टराईसँग पराजित भएका श्रेष्ठ दुई वर्षपछि गण्डकी प्रदेशबाट राष्ट्रिय सभामा निर्वाचित भएका हुन् । एमाले र माओवादी केन्द्रको मिलनपछि बनेको नेकपाका प्रवक्ता हुँदा उनलाई राष्ट्रिय सभाको टिकट दिइएको थियो ।
तत्कालिन नेकपा एमालेमा रहेका वामदेव गौतम बर्दियाको क्षेत्र नम्बर १ मा कांग्रेसका संजय कुमार गौतमसँग पराजित भएका थिए । संजय कुमार गौतम ४४,८२९ मतका साथ निर्वाचित हुँदा वामदेव गौतम ४४,०७६ मतमै रोकिएका थिए । प्रतिनिधि सभाको निर्वाचनमा पराजित भएका वामदेव गौतमलाई २०७७ साल असोज १ गते राष्ट्रिय सभा सदस्यमा मनोनित गरिएको थियो । उक्त समयमा उनी एमालेका उपाध्यक्ष थिए । तत्कालीन अर्थमन्त्री डा. युवराज खतिवडाको कार्यकाल सकिएपछि राष्ट्रियसभामा राष्ट्रपतिले मनोनित गर्ने तीनमध्ये एक सिट खाली थियो । उक्त खाली सिटमा गौतम मनोनित भएका हुन् ।
सरकारले मंसिर ४ का लागि प्रतिनिधि र प्रदेश सभा सदस्यको निर्वाचन तोकेको छ ।