सर्वाधिक चासोका साथ हेरिएको काठमाडौं महानगरको मतगणना जारी छ । वैशाख ३० गते सम्मन्न भएको स्थानीय तह सदस्य निर्वाचनको मतगणना राष्ट्रिय सभागृहमा भैरहेको छ ।
पछिल्लो मतपरिणाम अनुसार प्रमुख पदमा लौरो चुनाव चिह्नका स्वतन्त्र उम्मेदवार बालेन भनिने वालेन्द्र साह सुरुवातदेखि नै धेरै मतान्तर कायम गर्दै शीर्षस्थानमा रहेका छन् ।
साहलाई पछ्याइरहेका छन् गठबन्धनबाट नेपाली कांग्रेसकी सिर्जना सिंह र एमालेका केशव स्थापित ।
ताजा मतपरिणाम अनुसार साहले ३५७५१ मत पाउँदा दोस्रो स्थानमा रहेका नेकपा एमालेका स्थापितले १९५१९ र कांग्रेसकी सिंहले १९४५८ मत पाएका छन् । साह र स्थापितबीच १६ हजार २३२ मतको भिन्नता छ भने साह र तेस्रो स्थानमा रहेकी सिंहबीच १६ हजार २९३ मतको अन्तर रहेको छ ।
जबकी स्थापित सिंह भन्दा मात्र ६१ मतले अगाडि छन् । यसअगाडि उनीहरूबीच ११६ मतको अन्तर रहेकोमा पछिल्लो गणनामा सिंहले मतान्तर घटाउँदै लगेकी हुन् ।
त्यस्तै प्रमुख पदमा राप्रपाका मदनदास श्रेष्ठले १७९६ मत पाउँदा स्वतन्त्र उम्मेदवार सुमन सायमीले १२९३ मत पाएका छन् ।
उपप्रमुखमा नेकपा एमालेकी सुनिता डंगोल ३४१२८ मतका साथ शीर्षस्थानमा छिन् । उनलाई पछ्याइरहेका एकीकृत समाजवादीका रामेश्वर श्रेष्ठले १२२६० मत ल्याएका छन् । त्यस्तै सोही पदमा राप्रपाकी बिनिता मगैयाले ७१९३ मत ल्याएकी छन् ।
काठमाडौं महानगरमा अहिलेसम्म आधा मत गणना भैसकेको छ ।
