सर्वाधिक चासोमा रहेको काठमाडौं महानगरपालिकामा प्रमुख पदका स्वतन्त्र उम्मेदवार बालेन भनिने वालेन्द्र साह र उपप्रमुखमा नेकपा एमालेकी सुनिता डंगोलले तीव्र रफ्तारमा मतान्तर बढाइरहेका छन् ।
मतगणनाको पछिल्लो परिणाम अनुसार बालेन निकतम् प्रतिस्पर्धी नेकपा एमालेका केशव स्थापित भन्दा झण्डै आधा मतले नै अघि छन् । उता उपप्रमुखमा नेकपा एमालेकी डंगोल गठबन्धनका उम्मेदवारभन्दा तीन गुणा बढीले अगाडि छिन् ।
बालेनले अहिलेसम्म २९५८२ मत ल्याएका छन् । स्थापित १५९२१ मतसहित दोस्रो स्थानमा छन् । नेपाली कांग्रेसकी सिर्जना श्रेष्ठले पनि १५ हजार मत कटाएकी छन् । उनले १५ हजार ५७ मत ल्याएकी छन् ।
गठबन्धनकी सिंह र स्थापितबीच ९०२ मतको अन्तर रहेको छ भने स्वतन्त्र उम्मेदवार साह र सिंहबीचको मतान्तर १४ हजार ५७२ छ ।
महानगरमा अहिलेसम्म आधा मत पनि गणना भएको छैन । तर बालेनको अग्रता भने सुरुवातदेखि नै झण्डै दोब्बरको छ ।
उपप्रमुख पदमा भने एमालेकी सुनिता डंगोल अन्य उम्मेदवारहरूलाई निकै तल पार्दै तीव्र गतिमा अगाडि बढिरहेकी छन् । यो समाचार तयार पार्दासम्म डंगोलको मत २६५७५ छ भने गठबन्धनतर्फ एकीकृत समाजवादीका रामेश्वर श्रेष्ठले ८५९१ मत पाएका छन् ।
तेस्रो नम्बरमा राप्रपाकी बिनिता मगैयाले ३६२३ मत पाउँदा उपमेयरमा लौरो चुनाव चिह्नका स्वतन्त्र उम्मेदवार वेन्जीसिंह महर्जन २१४२ मतका साथ चौथो स्थानमा छन् ।
उपमेयरमा सूर्य चिह्नमा भोट हालेका मतदाताहरूले मेयरमा किन सूर्यलाई नहालेर अन्य उम्मेदवारहरूलाई भोट हाले भन्दै बहसको विषय बनिरहेको छ ।