मोरङको बूढीगंगा गाउँपालिकामा बालिकामाथि बलात्कारको प्रयास गरेको आरोपमा प्रहरीले कांग्रेसका एक जना नेतालाई पक्राउ गरेको छ ।
मोरङ प्रहरीका प्रवक्ता डिएसपी मञ्जिल मुकारुङका अनुसार १० वर्षीया बालिकामाथि बलात्कार प्रयास गरेको घटना बाहिरिएपछि बुढीगंगास्थित टंकिसिनुवारीका ५१ वर्षीय नेता शिव कोइराला पक्राउ परेका हुन् ।
टङ्कीसिनवारी क्षेत्रलाई आधार बनाएर राजनीति गर्दै आएका कोइराला कांग्रेसको पहिलो प्रदेश अधिवेशनबाट १ नम्बर प्रदेश समिति सदस्यमा निर्वाचित भएका थिए । नेपाली काङ्ग्रेसको १४औँ महाधिवेशनअन्तर्गत प्रदेश १ को महाधिवेशन प्रतिनिधिसमेत रहेका उनी टङ्कीसिनवारी जेसिजका पूर्वअध्यक्ष पनि हुन् ।
कोइरालाविरुद्ध मौखिक उजुरी परेका कारण पक्राउ गरिएको मुकारुङले केटिएम दैनिकलाई बताए । कोइरालाले पुस ३० गते घरनजिकको पसलपछाडि लगेर बालिकालाई बलात्कारको प्रयास गरेको प्रारम्भिक अनुसन्धानबाट खुलेको उनको भनाइ छ । घटनाका बारेमा दुई दिनपछि जानकारी पाएको प्रहरीले गाउँपालिका–१ घर भएका नेता कोइरालालाई आइतबार बिहान पक्राउ गरेको हो ।
मुकारुङले भने, ‘हामी अनुसन्धान गरिरहेका छौं । मौखिक उजुरी परेको छ, बालिकाको अवस्था के छ हामी हेर्दैछौं, कोइरालालाई हामीले नियन्त्रणमा लिएर अनुसन्धान गरिरहेका छौं ।’
प्रहरीका अनुसार बोलाएर बलात्कारको प्रयास गरेको र आफू फुत्किएर बचेको बालिकाले प्रहरीसमक्ष बयान दिएकी छन् । बालिकाले आफ्ना अभिभावकलाई घटना सुनाएपछि कोइरालालाई नियन्त्रणमा लिएर स्थानीयले आक्रमणसमेत गरेका छन् ।
कुटपिटबाट घाइते बनेका कोइराला विराटनगरको कोसी अस्पतालमा भर्ना भएका छन् । प्रहरीले निगरानी गर्दै उनको उपचार भइरहेको बताइएको छ ।