अतिरिक्त शुल्क नबुझाउने एमबिबिएसमा भर्ना भएका नयाँ विद्यार्थीलाई कलेज प्रवेशमा रोक लगाएपछि आन्दोलनरत पीडित विद्यार्थीहरूले मंगलबार नोबेल मेडिकल कलेज विराटनगरमा टायर बालेर प्रदर्शन गर्दै रिले अनशनमा बसेका छन् ।
एमबिबिएस शुल्क घटाउन माग गर्दै आन्दोलनरत विद्यार्थी तथा अन्य विद्यार्थी सङ्गठनले मङ्गलबार नोबेलअगाडि टायर बालेर प्रदर्शन गरेका हुन् ।
आइतबार भएको प्रदशर्नमा कलेज प्रशासनले हस्तक्षेप गर्दा दुई जना विद्यार्थी घाइते भएका थिए । पाँच विद्यार्थी सङ्गठनको साथमा प्रदर्शनमा उत्रिएको विद्यार्थीको समूहले अस्पताल तोडफोडसमेत गरेको थियो ।
सहमतिविपरीत एमबिबिएस प्रथम वर्षको कक्षा सञ्चालन गरेपछि विद्यार्थीहरूले नोबेलअगाडि केही दिनदेखि लगातार प्रदर्शन गरिरहेका छन् ।
अतिरिक्त शुल्क नबुझाउने विद्यार्थीलाई प्रवेश नदिई थोरै विद्यार्थीलाई मात्रै राखेर कक्षा सञ्चालन गरेपछि आइतबारबाट विद्यार्थीहरूले प्रदर्शन सुरु गरेका हुन् ।
पुस २२ मा कलेज प्रतिनिधि, विद्यार्थी सङ्गठन र अभिभावकसँग प्रमुख जिल्ला अधिकारीले गरेको बैठकमा चिकित्सा शिक्षा आयोगले निर्धारण गरेको शुल्कभन्दा अतिरिक्त शुल्क नलिने गरी पुस २५ गतेदेखि कक्षा सञ्चालन गर्ने सहमति भएको थियो ।
एमबिबिएस पहिलो वर्ष (१५औँ) ब्याचमा अध्ययनरत सम्पूर्ण विद्यार्थीलाई समेटेर कक्षा सञ्चालन गराउनुपर्ने र केही सीमित विद्यार्थीलाई राखेर कक्षा सञ्चालन गराउन नपाउने सहमति भएतापनि कलेजले उक्त सहमति तोडेको विद्यार्थीहरूको आरोप छ ।
सहमतिविपरीत एमबिबिएस प्रथम वर्षको कक्षा सञ्चालन गरेपछि विद्यार्थीहरूले विरोध प्रदर्शनलाइ निरन्तरता दिइरहेका छन् ।
कलेजले उक्त सहमति तोडेको अवस्थामा सम्पूर्ण समस्याहरू समाधान नभइन्जेलसम्मको लागि कक्षा सञ्चालन नै रोक्ने निर्णय भएको बताइएको भएतापनि स्थानीय प्रशासनले यो समाचार तयार पार्दासम्म केही कदम अगाडि बढाएको छैन ।
गृह मन्त्रालयले कारबाहीको निर्देशन दिएपनि कलेज सञ्चालकको राजनीतिक पहुँचका आधारमा प्रजिअले कारबाही प्रक्रिया अघि बढाउन नसकेको विद्यार्थी र अभिभावकको गुनासो छ ।