विराटनगरस्थित नोबेल मेडिकल कलेज प्रशासनले आन्दोेलनरत विद्यार्थीको प्रदर्शनमा हस्तक्षेप गर्दा दुई जना विद्यार्थी घाइते भएका छन् । कानुनविपरीत अतिरिक्त शुल्क असुलेको विरोधमा आन्दोलनरत विद्यार्थीहरू प्रर्दशनमा सुरक्षा गार्डले हस्तक्षेप गर्दा दुई जना घाइते भएका हुन् ।
आन्दोलनमा अस्पतालका सुरक्षा गार्डले बल प्रयोग गर्दै हस्तक्षेप गरेपछि पाँच विद्यार्थी सङ्गठनको साथमा प्रदर्शनमा उत्रिएको विद्यार्थीको समूहले अस्पताल तोडफोडसमेत गरेको छ ।
सुरक्षा गार्डको कुटाइबाट प्रर्दशनमा सहभागी एकीकृत समाजवादी विद्यार्थी सङ्गठनका केन्द्रीय सचिव किशन भगत र क्रान्तिकारी विद्यार्थी सगठनमा आवद्ध विद्यार्थी जीवरतन साह घाइते भएका हुन् । सुरक्षा गार्डको लाठी प्रहारबाट उनीहरूको टाउको र हातमा चोट लागेको छ ।
यस्तै, सुरक्षा गार्डको हस्तक्षेपका कारण तनाव उत्पन्न हुँदा विद्यार्थीहरूले अस्पतालमा ढुगा प्रहार गरेका थिए । आक्रोशित विद्यार्थीहरूले प्रहार गरेको ढुंगाबाट नोबेल अस्पतालको बाहिरतर्फको झ्यालका सिसाहरू फुटेका छन् । अवस्था नियन्त्रणमा लिन अस्पताल परिसरमा बाक्लो सुरक्षाकर्मी परिचालन गरिएको छ ।
सहमतिविपरीत एमबिबिएस प्रथम वर्षको कक्षा सञ्चालन गरेपछि विद्यार्थीहरूले नोबेलअगाडि प्रदर्शन गरेका थिए । अतिरिक्त शुल्क नबुझाउने विद्यार्थीलाई प्रवेश नदिई थोरै विद्यार्थीलाई मात्रै राखेर कक्षा सञ्चालन गरेपछि आइतबार विद्यार्थीहरूले प्रदर्शन गरेका थिए । तर सो प्रदर्शनमा सुरक्षा गार्ड आक्रोशित हुँदै लाठी चार्जमा उत्रिएपछि उनीहरूले अस्पताल तोडफोडमा गरेका हुन् ।