काठमाडौं । नेकपा (एमाले)का उपमहासचिव योगेशकुमार भट्टराईले उचित मुद्दा, समय र परिस्थिति निर्माण भएपछि पार्टी सडक आन्दोलनमा जाने बताएका छन् ।
बिहीबार सञ्चारकर्मीसँग कुरा गर्दै उनले लोकतन्त्रमा सडक जनताका आवाज र असन्तुष्टि अभिव्यक्त गर्ने महत्त्वपूर्ण माध्यम भएकाले सडक आन्दोलनलाई विध्वंसका रूपमा मात्र बुझ्न नहुने बताए । सरकारका लोकतन्त्रविरोधी गतिविधिविरुद्ध पार्टीले संयमित, सभ्य र शान्तिपूर्ण ढंगले आवाज उठाउने उनको भनाइ थियो ।
भट्टराईले पार्टीको विचार, संगठन, नेतृत्व, व्यवहार र कार्यशैलीमा एकीकृत रूपान्तरण आवश्यक रहेको पनि बताए । पार्टी जीवित रहुन्जेल पुनर्गठनको मुद्दा निरन्तर अघि बढिरहने उल्लेख गर्दै उनले संगठन सुदृढीकरणसँगै स्थानीय तह र प्रदेश निर्वाचनको तयारीलाई पनि समानान्तर रूपमा अघि बढाइने जानकारी दिए ।