काठमाडौँ– सुरक्षण मुद्रण केन्द्रले बाढीबाट प्रभावित नागरिकको राहत तथा पुनःस्थापनाका लागि प्रधानमन्त्री राहत कोषमा एक करोड पाँच लाख रुपैयाँ सहयोग गरेको छ ।
केन्द्रका कार्यकारी निर्देशक देवराज ढुंगानाले बिहीबार उक्त रकम बराबरको चेक अर्थमन्त्री स्वर्णिम वाग्लेलाई हस्तान्तरण गरेका हुन् ।
चेक हस्तान्तरण कार्यक्रममा सूचना तथा सञ्चारमन्त्री विक्रम तिमिल्सिना, कानुन, न्याय तथा संसदीय मामिलामन्त्री सोविता गौतम, सञ्चार सचिव राजेन्द्र पौडेलसहित अर्थ मन्त्रालयका सहसचिवहरूको उपस्थिति थियो ।
केन्द्रले आफ्नै आम्दानीबाट उक्त रकम जुटाएर बाढी प्रभावित परिवारको राहत तथा पुनःस्थापनामा सहयोग गरेको जनाएको छ ।
केन्द्रका अनुसार पछिल्लो एक वर्षमा संस्थागत तथा आर्थिक सुधार गर्दै सवारी चालक अनुमतिपत्र र हुलाक टिकट छपाइमार्फत आफ्नो क्षमता विस्तार गरिएको छ । लामो समयदेखि बाँकी रहेको सवारी चालक अनुमतिपत्रको २७ लाख थान छपाइ छ महिनाभित्र सम्पन्न गरी यातायात व्यवस्था विभागलाई हस्तान्तरण गरिएको केन्द्रले जनाएको छ ।
यसअघि सवारी चालक अनुमतिपत्र छपाइका लागि ठूलो रकम विदेशी मुद्रामा खर्च गर्नुपर्ने अवस्था रहेकामा अहिले स्वदेशमै छपाइ हुन थालेपछि विदेशी मुद्रा बचत हुनुका साथै सुरक्षण मुद्रण क्षेत्रमा नेपालको क्षमता पनि विकास भएको केन्द्रको भनाइ छ ।
कार्यकारी निर्देशक ढुंगानाका अनुसार आगामी दिनमा राष्ट्रिय परिचयपत्र, अन्तःशुल्क टिकट र नागरिकता प्रमाणपत्रलगायत उच्च सुरक्षणयुक्त कागजातसमेत स्वदेशमै छपाइ गर्ने तयारी भइरहेको छ । अन्तःशुल्क टिकट छपाइका लागि आन्तरिक राजस्व विभागसँग आवश्यक कार्यढाँचा निर्माणको काम भइरहेको उनले जानकारी दिए ।
राज्यका संवेदनशील कागजात स्वदेशमै छपाइ गर्दा तथ्याङ्क सुरक्षा र राष्ट्रिय सार्वभौमिकता सुदृढ हुनुका साथै विदेशी आपूर्तिकर्तामाथिको निर्भरता घट्ने ढुंगानाको भनाइ छ ।
कार्यक्रममा अर्थमन्त्री वाग्ले र सञ्चारमन्त्री तिमिल्सिनाले केन्द्रको क्षमता विस्तार तथा आवश्यक पूर्वाधार विकासका लागि सरकारले सहयोग गर्ने प्रतिबद्धता व्यक्त गरेका थिए ।