काठमाडौँ । नेपाल प्रिमियर लिग (एनपीएल) को दोस्रो क्वालिफायरमा सुदूरपश्चिम रोयल्स र चितवन राइनोजबीच प्रतिस्पर्धा भइरहेको छ। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा चितवन राइनोजले टस जितेर पहिले ब्याटिङ गर्ने निर्णय गरेको छ।
चितवनका कप्तान सिकन्दर राजाले टस जित्दै सुदूरपश्चिमलाई पहिले बलिङको निम्तो दिएका हुन्।
फाइनल प्रवेशका लागि हुन लागेको यो निर्णायक भिडन्तमा सुदूरपश्चिमका कप्तान दीपेन्द्रसिंह ऐरी र चितवनका कप्तान रवि बोपाराबीचको रणनीतिक प्रतिस्पर्धालाई विशेष चासोका साथ हेरिएको छ।
एनपीएलका तीनवटै संस्करणको प्रदर्शन हेर्दा दीपेन्द्र सफल र निरन्तर लयमा रहेका कप्तानका रूपमा देखिएका छन्। उनको नेतृत्वमा सुदूरपश्चिमले पहिलो र दोस्रो दुवै संस्करणको फाइनल खेलेको थियो।
जारी संस्करणको लिग चरणमा पाँच जितसहित १० अङ्क जोडेर दोस्रो स्थानमा रहँदै सुदूरपश्चिमले प्लेअफमा स्थान बनाएको हो। पहिलो क्वालिफायरमा लुम्बिनी लायन्ससँग ६ विकेटले पराजित भए पनि टोली फाइनल प्रवेशको अर्को अवसर सदुपयोग गर्ने लक्ष्यमा छ।
प्रतियोगितामा दीपेन्द्रले अहिलेसम्म २०२ रन बनाइसकेका छन्। आक्रामक ब्याटिङ, प्रभावकारी बलिङ र उत्कृष्ट फिल्डिङ उनको प्रमुख विशेषता हुन्। एनपीएलका तीन संस्करणमा चितवनसँग भएका तीन खेलमध्ये दुईमा सुदूरपश्चिम विजयी भएको छ।
अर्कोतर्फ, अघिल्लो संस्करणमा लिग चरणबाटै बाहिरिएको चितवनले यसपटक उत्कृष्ट पुनरागमन गरेको छ। लिग चरणमा सात अङ्क जोड्दै चौथो स्थानमा रहेर प्लेअफ पुगेको चितवनले बुधबार भएको इलिमिनेटरमा काठमाडौँ गोर्खाजलाई ६१ रनले पराजित गर्दै दोस्रो क्वालिफायरमा स्थान बनाएको हो।
चितवनका कप्तान रवि बोपाराले आफ्नो ५००औँ टी–२० खेलमा ५३ रनको महत्त्वपूर्ण योगदान दिएका थिए। जारी प्रतियोगितामा उनले २३७ रन बनाइसकेका छन्। अनुभव र परिस्थितिअनुसार ब्याटिङ गर्ने क्षमताका कारण उनी चितवनका प्रमुख खेलाडी हुन्।
समग्र प्रदर्शन र हेड टु हेडमा सुदूरपश्चिम बलियो देखिए पनि चितवन पनि कम चुनौतीपूर्ण छैन। बोपाराको अनुभव र कामिल मिश्राको शतकीय लयले चितवनलाई उपाधि दौडमा बलियो दाबेदार बनाएको छ।
साँझ ५ बजे सुरु हुने यस खेलको विजेताले शनिबार हुने फाइनलमा साविक विजेता लुम्बिनी लायन्ससँग प्रतिस्पर्धा गर्नेछ। लुम्बिनीले पहिलो क्वालिफायरमा सुदूरपश्चिमलाई ६ विकेटले हराउँदै फाइनलमा स्थान सुरक्षित गरिसकेको छ।
पहिलो संस्करणमा जनकपुर बोल्ट्स र दोस्रो संस्करणमा लुम्बिनी लायन्ससँग फाइनलमा पराजित भएको सुदूरपश्चिम यसपटक तेस्रो प्रयासमा उपाधि जित्ने लक्ष्यमा छ। चितवन भने पहिलोपटक फाइनल पुग्दै उपाधि जित्ने अवसरको खोजीमा रहेको छ।