काठमाडौँ । भारतको उत्तराखण्डस्थित प्रसिद्ध तीर्थस्थल बदरीनाथ धामबाट देहरादुनतर्फ फर्किँदै गरेको एक हेलिकप्टर शुक्रबार सम्पर्कविहीन भएको छ ।
चमोली जिल्लाबाट देहरादुनको सहस्रधारातर्फ उडेको हेलिकप्टरका पाइलटसँग अहिलेसम्म सम्पर्क स्थापित हुन नसकेको भारतीय सञ्चारमाध्यमले जनाएका छन् ।
प्रारम्भिक जानकारीअनुसार हेलिकप्टरमा चालक दलका सदस्यसहित छ जना यात्रु सवार थिए । हेलिकप्टर उडेको केही समयपछि सम्पर्कविहीन भएको बताइएको छ ।
घटनाबारे जानकारी प्राप्त हुनासाथ उत्तराखण्ड नागरिक उड्डयन विकास प्राधिकरण र प्रहरीको टोली खोजी तथा उद्धार कार्यमा परिचालित भएको छ । उद्धार टोलीले पाइलटसँग रेडियो तथा अन्य सञ्चार माध्यमबाट सम्पर्क स्थापित गर्ने प्रयास गरिरहेको छ ।
उक्त क्षेत्रमा प्रतिकूल मौसमका कारण खोजी कार्यमा कठिनाइ भइरहेको छ । खराब मौसमका बाबजुद हेलिकप्टरको अवस्थिति पत्ता लगाउन ड्रोनको समेत प्रयोग गरी खोजी तीव्र पारिएको प्रशासनले जनाएको छ ।
हेलिकप्टर दुर्घटनामा परेको हो वा अन्य कारणले सम्पर्कविहीन भएको हो भन्नेबारे यकिन हुन सकेको छैन । घटनाबारे थप विवरण आउन बाँकी छ ।
