सरकारको नेतृत्व गरिरहेको राष्ट्रिय स्वतन्त्र पार्टीका सांसद आशिका तामाङले नेपालमा गाँजा खेतीलाई वैधानिकता दिन माग गरेकी छन्। प्रदेश सरकारहरूले गाँजालाई वैधानिकता दिने कानुन बनाउनुपर्ने तामाङको माग छ।
शनिबार गाँजाको बोटसँग खिचेको तस्बिर सामाजिक संजालमा राख्दै सांसद तामाङले औषधीय तथा औद्योगिक प्रयोजनका लागि नेपालमा गाँजा खेतीलाई वैधानिकता दिने कानुन बनाउनुपर्ने बताएकी हुन् ।
गाँजा खेतीलाई वैधानिकता दिएमा किसानको आम्दानी बढ्ने तामाङको दाबी छ। ‘गण्डकी प्रदेशले जस्तै अन्य प्रदेशले पनि औषधीय तथा औद्योगिक प्रयोजनका लागि गाँजा खेतीलाई वैधानिकता दिन संघीय कानुनसँग समन्वय गरी आवश्यक कानुन बनाउनुपर्छ,’ तामाङले फेसबुकमा लेखेकी छन्, ‘बागमती प्रदेशले पनि अनुमति र नियमनसहित गाँजा खेतीको कानुनी व्यवस्था गरे धादिङ जिल्लामा किसानको आम्दानी बढाउन, रोजगारी सिर्जना गर्न र स्थानीय अर्थतन्त्र बलियो बनाउन ठूलो सम्भावना छ ।’
गण्डकी प्रदेशले कानुन बनाएर गाँजा खेतीलाई वैधानिकता दिएको छ। सोही प्रसंगलाई सांसद तामाङले उल्लेख गरेकी हुन्।
गाँजाको तस्बिर सामाजिक संजाल फेसबुकमा राखेर तामाङले लेखेकी छन्, ‘गाँजाको बासना, नबोले नि हाँसी राखन…’
