ऋषि कपुरको बिहिबार बिहान ८ बजेर ४५ मिनेटमा निधन भयो । परिवारको तर्फबाट एक पत्र लेख्दै उक्त्त कुराको पृष्टी गरेको हो । उनको परिवारले पत्रमार्फत उनले अन्तिम समयसम्म पनि आफ्नो बानी नछाडेको र अस्पतालमा डाक्टर–मेडिकल स्टाफलाई हँसाइरहे, उनीहरुलाई मनोरञ्जन प्रदान गरिरहेको उल्लेख छ ।
हेरौं पत्र
परिवारले भने, ‘ल्यूकेमिया हुँदासमेत परिवार, साथीभाइ, फिल्म र खानामा उनको ध्यान केन्द्रीत थियो’
ऋषि कपुरको निधन पछि परिवारको तर्फबाट जारी गरेकाे पत्रमा लेखिएकाे छ, ‘दुई वर्षसम्म ल्यूकेमियासँगको युद्धपछि हाम्रा प्यारा ऋषि कपुरको आज बिहान ८ बजेर ४५ मिनेटमा निधन भयो । अस्पतालका डाक्टर तथा स्वास्थ्यकर्मीले अन्तिम समयसम्म आफूहरुलाई मनोरञ्जन दिइरहेको बताए । दुई महाद्वीपमा उनको दुई वर्षसम्म उपचार चल्यो र यतिबेला उनले निकै हँसीमजाक गरिरहे । परिवार, साथीभाइ, खाना र फिल्म उनको फोकसमा रह्यो । ’
‘संसारभरीबाट पाएको प्रशंसकको प्रेमप्रति उनी ऋणी थिए । उनको निधनपछि सबै प्रशंसकले यो बुझनेछन् कि ऋषि आँसुसहित होइन, मुस्कानसहित याद गरिनेछन् । यो क्षतीबीच हामीले यो बुझिरहेका छौं कि संसार अहिले निकै मुश्किल अवस्थाबाट गुज्रिरहेको छ । मानिसहरुको आवतजावत र एकै स्थानमा जम्मा हुन प्रतिबन्ध छ । हामी उनका सबै प्रशंसक, शुभ चिन्तक र आफन्तलाई नियम कानूनको सम्मान गरिदिन आग्रह गर्छौं ।’
अमेरिकामा भन्डै एक वर्ष क्यान्सरको उपचार गरेपछि गत सेप्टेम्बरमा ऋषि मुम्बई फर्किएका थिए । त्यतिबेला उनले ‘११ महिना ११ दिनपछि घर फर्किएँ’ भन्दै ट्वीट गरेका थिए । गत फेब्रुअरीमा पनि उनी दुई पटक अस्पताल भर्ना भएका थिए । सुरुमा दिल्ली जाँदा उनलाई ‘इन्फेक्सन’ले सताएको थियो भने मुम्बई फर्किएपछि ज्वरो आएको थियो ।
सामाजिक सञ्जालमा निकै सक्रिय ऋषिले अप्रिल २ यता केही पोस्ट गरेका थिएनन् । त्यसअगाडि उनले दीपिका पादुकोणसँग फिल्म खेल्न लागेको घोषणा गरेका थिए । यो फिल्म हलिउड फिल्म ‘द इर्टन’को हिन्दी रिमेक हुनेछ । अमेरिकाबाट फर्किएपछि जुही चावलासँग ‘शर्माजीकी नम्किन’को सुटिङ गरेका थिए तर स्वास्थ्यमा समस्या आएपछि बीचमै सुटिङ रोकिएको टाइम्स अफ इन्डियाले जनाएको छ ।
श्वास फेर्न गार्ह्रो भएपछि उनलाई मुम्बइको सर एचएन रिलायन्स फाउन्डेसनमा हिजो (बुधबार) बिहान भर्ना गरिएको उनका श्रीमती नितु कपुरले सञ्चारमाध्यमलाई बताएकी थिइन् । सन् २०१८ बाट उनी क्यान्सरबाट पीडीत थिए ।
केही दिन अगाडी उनले दिएको अभिव्यक्ति विवादित बनेको थियो । उनले भनेका थिए “लकडाउनको समयमा हप्तामा एक दिन भएपनि रक्सी पसलहरु खोल्नुपर्छ ।”
हिजो मात्रै इफरान खानको निधनले शोकमा रहेको बलिउड जगत आज ऋषि कपुरको निधनले झन शोकमा डुवेको छ ।