काठमाडौं। नेकपा एमालेका महासचिव शंकर पोखरेलले प्रधानमन्त्री बालेन्द्र साह राजनीतिक दलहरूसँग संवाद गर्नबाट टाढिएको टिप्पणी गरेका छन्। उनले चुनौतीपूर्ण अवस्थामा सरकार राजनीतिक दलहरूसँग सहकार्य गरेर अघि बढ्नुपर्नेमा स्वेच्छाचारी बाटोतर्फ उन्मुख भएको टिप्पणी गरे।
एमाले केन्द्रीय कार्यालय च्यासलमा शनिबार आयोजित संविधान दिवस समारोहलाई सम्बोधन गर्दै पोखरेलले संसदीय लोकतन्त्रमा प्रधानमन्त्रीले आफ्नै दलको बैठकमा सहभागी नहुनु र संसद्बाट निर्वाचित प्रधानमन्त्री संसद्प्रति जवाफदेही नहुनु असामान्य भएको बताए।
‘राजनीतिक दलहरूसँगको संवाद त प्रधानमन्त्रीका लागि एकादेशको कथा जस्तो छ,’ पोखरेलले भने।
उनले वर्तमान सरकार जेन–जी आन्दोलनको जगमा बनेको भनिए पनि आन्दोलनका मागलाई अपहरण गरी मुलुकलाई विध्वंसको बाटोतर्फ लैजानेहरूको सरकार बनेको आरोप लगाए। पछिल्लो समय जेन–जी अभियानकर्ताहरूले नै आन्दोलनपछि मुलुकलाई संविधानविहीनतातर्फ लैजाने प्रयास भएकोबारे सार्वजनिक रूपमा बोल्न थालेको उनको दाबी थियो।
भोटेकोशी र त्रिशूलीमा आएको बाढीबाट मुलुक संकटमा रहेका बेला सरकार राजनीतिक दलहरूसँग मिलेर विपद्को सामना गर्नुपर्नेमा अन्य दिशातर्फ अघि बढिरहेको पोखरेलले बताए।
सरकारले संविधानमा छेडखानी गर्ने प्रयास गरिरहेको आरोप लगाउँदै उनले प्रतिनिधिसभाको नियमावलीमार्फत संवैधानिक व्यवस्था हेरफेर गर्ने प्रयासलाई सर्वोच्च अदालतले रोकेको बताए। यसलाई उनले संविधानको रक्षाका लागि सकारात्मक कदम भएको उल्लेख गरे।
अध्यादेश जारी गर्ने संवैधानिक व्यवस्था हुँदाहुँदै संसदीय नियमावलीमार्फत कार्यकारी आदेशको प्रबन्ध गर्न खोजेर सरकारले संसदीय लोकतन्त्रलाई अधिनायकवादी बाटोतर्फ लैजान खोजेको पनि पोखरेलले आरोप लगाए।
