काठमाडौं। नेपाली कम्युनिस्ट पार्टीका सांसद एवं पूर्वमन्त्री वर्षमान पुनले संविधानका आधारभूत संरचनामाथि प्रहार गर्ने वा पुनर्लेखनतर्फ जाने प्रयासले मुलुकलाई फेरि द्वन्द्वतर्फ धकेल्न सक्ने बताएका छन्।
काठमाडौंमा आयोजित ‘संविधान कार्यान्वयनको दोस्रो दशक : अवसर र चुनौती’ विषयक कार्यक्रममा बोल्दै पुनले संविधान निर्माणका क्रममा भएका संघर्ष र बलिदानबाट प्राप्त उपलब्धिलाई सहजै नकार्न वा कमजोर पार्न नहुने बताए।
उनले संघीयता, गणतन्त्र, धर्मनिरपेक्षता, समावेशिता र सामाजिक न्यायलाई संविधानका आधारभूत संरचनाका रूपमा उल्लेख गर्दै यी उपलब्धिमाथि प्रहार गर्ने प्रयासले अर्को चरणको द्वन्द्वको जोखिम निम्त्याउन सक्ने बताए।
‘संविधानका आधारभूत फाउन्डेसनमै प्रहार गर्ने वा संविधान पुनर्लेखनतर्फ जाने प्रयास गरियो भने देश फेरि अर्को चरणको द्वन्द्वतर्फ जाने जोखिम रहन्छ,’ पुनले भने।
तर बदलिँदो शक्ति सन्तुलन, नयाँ राजनीतिक शक्ति र नयाँ सम्भावनालाई सम्बोधन गर्दै संविधानलाई समयअनुकूल विकास र परिमार्जन गर्दै लैजानुपर्ने उनको भनाइ छ। संविधानको विकास र आवश्यक सुधारमार्फत अघि बढ्न सके मुलुकले राजनीतिक स्थायित्व प्राप्त गर्ने उनले बताए।
विगतका संघर्षबाट प्राप्त उपलब्धिको संरक्षण गर्दै समयअनुकूल सुधारमार्फत संविधानलाई अघि बढाउनुपर्नेमा पुनले जोड दिए।
