काठमाडौँ -प्रतिनिधिसभाको आजको बैठकमा सांसदहरूले भोटेकोशी बाढीमा बेपत्ता भएका व्यक्तिको डीएनए परीक्षणको प्रतिवेदन छिटो उपलब्ध गराउन माग गरेका छन्। उनीहरूले विपद्जन्य घटनामा उद्धार तथा खोजी कार्यलाई प्रभावकारी बनाउन सरकारको ध्यानाकर्षण गराए।
सभाको आकस्मिक समयमा राष्ट्रिय स्वतन्त्र पार्टी (रास्वपा)की सांसद इन्दिरा राना मगरले विपत्तिमा परेकाहरूका लागि मानसिक स्वास्थ्य उपचारलगायत अत्यावश्यक सेवाको तत्काल व्यवस्था गर्न सरकारसँग माग गरिन्।
राष्ट्रिय प्रजातन्त्र पार्टी (राप्रपा)की सांसद खुश्बु ओलीले भोटेकोशी बाढीमा बेपत्ता भएका व्यक्तिको डीएनए परीक्षणको प्रतिवेदन कहिले आउँछ भन्ने प्रश्न पीडित परिवारले आफूहरूसँग गर्न थालेको बताइन्। उनले परीक्षणको नतिजा छिटो सार्वजनिक गर्न आग्रह गरिन्।
रास्वपाकी सांसद समीक्षा बाँस्कोटाले बाढीमा परी घाइते भई अस्पतालको सघन उपचार कक्ष (आईसीयू)मा उपचाररत बिरामीसँग अन्तर्वार्ता लिने कार्यले स्वास्थ्य तथा सञ्चार क्षेत्रका आचारसंहितामाथि गम्भीर प्रश्न उठाएको बताइन्।
नेकपा (एमाले)का सांसद ऐनबहादुर महरले भोटेकोशी बाढीमा बेपत्ता भएका व्यक्तिका परिवारको पीडा थप जटिल बन्दै गएको भन्दै खोजी तथा उद्धार कार्यलाई तीव्रता दिन सरकारसँग आग्रह गरे।
नेपाली कम्युनिष्ट पार्टी (नेकपा)का सांसद रमेश मल्लले मोटरसाइकलमा सल बेरिएर महिलाको मृत्यु भएको घटनाको उदाहरण दिँदै यस्ता दुर्घटना न्यूनीकरणका लागि सडक सुरक्षा लगायतका विषयमा विशेष ध्यान दिन सरकारको ध्यानाकर्षण गराए।
नेकपाकी सांसद पार्वती विकले सहरमा दलित समुदायका व्यक्तिले कोठा नपाउने समस्या अझै कायम रहेको बताउँदै लामो समयदेखि सडकमा बस्न बाध्य एक महिलाको उदाहरण प्रस्तुत गरिन्। उनले यस्ता समस्या समाधानका लागि आवश्यक कानुनी व्यवस्था गर्न सरकारसँग माग गरिन्।
