काठमाडौं ।रसुवाको भोटेकोशी नदीमा भदौ १० गते आएको बाढीसहित मुलुकभर बाढी, पहिरो तथा अन्य प्राकृतिक विपद्मा परी ज्यान गुमाएकाको स्मृतिमा पशुपतिनाथ मन्दिर परिसरमा दीप प्रज्वलन गरिएको छ।
पशुपति क्षेत्र विकास कोषको आयोजनामा दिवंगत आत्माको चिरशान्तिको कामना तथा शोकसन्तप्त परिवारप्रति समवेदना प्रकट गर्दै आज साँझ पशुपतिनाथ मन्दिर अगाडि दीप प्रज्वलन गरिएको हो। कोषका सदस्य सचिव तीर्थ श्रेष्ठले दीप प्रज्वलन गरिएको जानकारी दिए।
दीप प्रज्वलनका क्रममा विपद्मा परी घाइते भएकाको शीघ्र स्वास्थ्यलाभ तथा बेपत्ता भएकाको अवस्था यथाशीघ्र पत्ता लागोस् भन्ने कामनासमेत गरिएको श्रेष्ठले बताए।
दीप प्रज्वलनमा हजारौँ भक्तजन सहभागी भएका छन्। यसअघि आज बिहान पशुपतिनाथस्थित वाग्मती तटमा विभिन्न धर्मग्रन्थको पाठ तथा पारायणसमेत गरिएको थियो।
