सुनसरी । सप्तकोशी नदीमा पानीको बहाव निरन्तर बढेपछि कोशी ब्यारेजका २२ वटा ढोका खोलिएका छन्।
जिल्ला प्रहरी कार्यालय सुनसरीका सूचना अधिकारी चन्द्रबहादुर खड्काका अनुसार साँझ ६ बजे गरिएको मापनमा ब्यारेजमा प्रतिसेकेन्ड १ लाख ८४ हजार ७८५ क्युसेक पानीको प्रवाह रहेको थियो। त्यसबेला २१ वटा ढोका खोलिएका थिए।
पानीको बहाव थप बढेर प्रतिसेकेन्ड १ लाख ९२ हजार ५३५ क्युसेक पुगेपछि थप एक ढोका खोल्दै २२ वटा ढोका सञ्चालनमा ल्याइएको हो।
कोशी ब्यारेजमा पानीको बहाव १ लाख ५० हजार क्युसेकभन्दा माथि पुगेपछि पश्चिमतर्फ खतराको सङ्केतस्वरूप रातो बत्ती बाल्ने गरिन्छ।
हालसम्म डुबानको प्रत्यक्ष जोखिम नरहे पनि दिउँसोदेखि नै नदीको जलसतह बढिरहेको प्रहरीले जनाएको छ। सम्भावित जोखिमलाई ध्यानमा राख्दै सप्तकोशी आसपासका बासिन्दा तथा सम्बन्धित निकायलाई सतर्क रहन र जोखिमयुक्त क्षेत्रमा नजान आग्रह गरिएको छ।
विशेषगरी नदीको तटीय क्षेत्रमा बसोबास गर्ने नागरिकलाई सुरक्षित स्थानमा रहन, साथै कोशी नदीमा माछा मार्ने तथा दाउरा सङ्कलनजस्ता गतिविधि नगर्न जिल्ला प्रहरी कार्यालय सुनसरीले अनुरोध गरेको छ।
