काठमाडौं । काठमाडौं महानगरपालिकाकी कार्यवाहक प्रमुख सुनिता डंगोलले काठमाडौं फिल्म फेस्टिभलले उपत्यकाको कला, संस्कृति तथा सम्पदाको संरक्षण र प्रवर्द्धनसँगै पर्यटन विकासमा योगदान पुर्याउने विश्वास व्यक्त गरेकी छन्।
फिल्म फेस्टिभलको तेस्रो दिन आइतबार राष्ट्रिय सभागृहमा आयोजित कार्यक्रममा बोल्दै डंगोलले महोत्सवले स्थानीय सिर्जनात्मक क्षेत्रको विकास र काठमाडौंका मौलिक कथा, कला तथा संस्कृतिलाई अन्तर्राष्ट्रियस्तरमा चिनाउन सहयोग पुग्ने बताइन्।
जीवन्त र समृद्ध सहर निर्माणका लागि कला, संस्कृति र सम्पदाको संरक्षणसँगै सिर्जनात्मक क्षेत्रको विकास आवश्यक रहेको उनको भनाइ थियो। महानगरले यस क्षेत्रको विकासका लागि विभिन्न प्रयास गर्दै आएको उल्लेख गर्दै उनले फिल्म फेस्टिभललाई त्यसैको निरन्तरताका रूपमा लिएको बताइन्।
स्थानीय कलाकार तथा चलचित्रकर्मीलाई अन्तर्राष्ट्रिय मञ्चसम्म पहुँच विस्तार गर्ने उद्देश्यले महोत्सव आयोजना गरिएको उनले बताइन्। यसले पर्यटन प्रवर्द्धनसँगै काठमाडौंका मौलिक कथा विश्वमाझ पुर्याउन सहयोग गर्ने उनको विश्वास छ।
